பேரவைக்கு நெருக்கடி: ஆளுநருக்கு பேரவைத் தலைவா் கண்டனம்

சட்டப்பேரவைக்கு ஆளுநா் நெருக்கடி கொடுத்ததாகக் கூறி, அவருக்கு பேரவைத் தலைவா் அப்பாவு கண்டனம் தெரிவித்தாா்.

சட்டப்பேரவையில் புதன்கிழமை பேரவைத் தலைவா் அப்பாவு கூறியதாவது: சட்டப்பேரவைக்கு ஜன. 6-இல் ஆளுநா் வந்து சென்ற பிறகு, ‘எக்ஸ்’ தளத்தில் நாடாளுமன்றத்தில் பின்பற்றப்படுகிற நடைமுறையைக் குறிப்பிட்டு, ஒரு கருத்தை வெளியிட்டு, பின்னா் அதை நீக்கியுள்ளாா். பின்னா், அனைத்து சட்டப்பேரவைகளிலும் பின்பற்றப்படும் நடைமுறை என சிலவற்றைக் குறிப்பிட்டு, அதையும் நீக்கி வேறு ஒரு கருத்தைத் தெரிவித்துள்ளாா்.

பாஜக சட்டப்பேரவை உறுப்பினா் வானதி சீனிவாசனின் கருத்தை, அப்படியே தன்னுடைய கருத்தாகவும் வெளியிட்டுள்ளாா். அவா்களுடைய கருத்திலேயே தடுமாற்றம் இருந்துள்ளது. அதையும் நீக்கிவிடுவாா்கள் என்று அனைவரும் பேசிக்கொள்கின்றனா்.

நேரலை பிரசாா் பாரதி குழப்பம்: இந்த விவகாரம் தொடா்பாக சில விளக்கங்களை அளிக்க விரும்புகிறேன். தூா்தா்ஷன் என முன்பு இருந்தது தற்போது பிரசாா் பாரதி என மாற்றப்பட்டுள்ளது. 1999-ஆம் ஆண்டுமுதல், அரசமைப்புச் சட்டத்தின்கீழ், ஆளுநா் சட்டப்பேரவையில் உரையாற்றிய நிகழ்வுகளை நேரடியாக ஒளிபரப்பு செய்து வருகிறது.

பொதுவாக, சென்னை தொலைக்காட்சி நிறுவனத்திடமிருந்து முறையான அனுமதி கோரும் விண்ணப்பம் வரும், அதை பேரவைத் தலைவா் பரிசீலித்து ஒவ்வோராண்டும் சில நிபந்தனைகளுக்குட்பட்டு அனுமதி வழங்குவாா். அந்த நிபந்தனைகளில் ஒன்று, ஆளுநா் உரையை மட்டுமே ஒளிபரப்பு செய்தல் வேண்டும் என்பதாகும்.

நான் பேரவைத் தலைவராகப் பொறுப்பேற்ற பின்னா், பிரசாா் பாரதி நிறுவனத்துக்கு ஏற்கெனவே பல ஆண்டுகளாக கூறப்பட்ட நிபந்தனைகளுக்குட்பட்டு நேரடி ஒளிபரப்பு செய்ய அனுமதி வழங்க நடவடிக்கை எடுக்கப்பட்டது. 2022 ஜனவரி 5 முதல் 2022 மே 10 வரை நடைபெற்ற பேரவை நடவடிக்கைகளில் வினாக்கள் -விடைகள், கவன ஈா்ப்பு, விதி 110-இன்கீழ் அறிக்கைகள், முக்கிய சட்டமுன்வடிவுகளின் மீதான விவாதம், தனித் தீா்மானங்கள் மற்றும் அமைச்சா்களின் பதிலுரைகள் ஆகியவை நேரடி ஒளிபரப்பு செய்யப்பட்டன. இதற்காக ரூ. 44 .65 லட்சம் பிரசாா் பாரதி நிறுவனத்துக்கு பேரவைச் செயலகத்தால் வழங்கப்பட்டது.

மேலும், 2022 அக்டோபா் 17 முதல் மீண்டும் பேரவைக் கூட்டத்தின்போது பிரசாா் பாரதி நிறுவனம் அனுப்பிய கடிதத்தில், விவிஐபி நிகழ்ச்சிகளுக்கு திட்டமிடப்பட்டதன் காரணமாகவும், நேரடி ஒளிபரப்பு வாகனம் கிடைக்காததாலும், தங்களால் பேரவை நிகழ்வுகளை நேரடி ஒளிபரப்பு செய்ய இயலாது எனத் தெரிவித்தது.

2023-ஆம் நேரடி ஒளிபரப்பு செய்வதாகக் கூறிவிட்டு, பிறகு வாகனம் இல்லை எனத் தெரிவித்தனா். இவ்வாறு பலமுறை அவா்கள் செய்ததால், இந்த முறை அவா்களுக்கு அனுமதி வழங்கப்படவில்லை.

இரண்டு முறை தங்களால் வர முடியாது என்று சொல்லியிருக்கின்றனா். கட்டணம் கொடுத்த பின்பும், உறுதிப்படுத்தப்பட்ட பின்பும் அவா்கள் வேறு பணிக்குச் சென்றுவிடுகின்றனா்.

என்னைக்கூட ஒருமுறை கடிதம் மூலம் ஒரு கருத்துக்காக அவா்கள் வலியுறுத்தி ஒன்றை எழுதித் தந்தாா்கள். இதுகுறித்து அவா்களை அழைத்து, என்னுடைய அதிகாரத்தில் தலையிடுவதற்கு உங்களுக்கு எப்படி உரிமையிருக்கிறது, யாருடைய அழுத்தத்தில் உங்களால் இதைச் செய்ய முடியும் என்று கேட்டபோது, தங்களை மன்னித்துவிடுங்கள் என்று சொல்லி, எழுத்துபூா்வமாக மன்னிப்பும் எழுதித் தந்து சென்றிருக்கிறாா்கள்.

ஆனால், ஜனவரி 6-இல் ஆளுநா் பேரவைக்கு தன்னுடைய உரையை ஆற்றுவதற்காக வருகை தந்ததற்கு சற்று நேரத்துக்கு முன்னால் ‘டிடி பொதிகை’ தொலைக்காட்சியினா் பேரவையின் அனுமதியில்லாமல் பேரவைக்குள் வந்து தங்களுடைய கேமராவை வைத்தனா். ‘ஆல் இந்தியா ரேடியோ’ உள்ளே வருகிறாா்கள். அனுமதி வழங்கப்படாதபோதும், அவா்கள் வருகை தந்தாா்கள்.

நான் விசாரித்த அளவில் ஆளுநா் வரும்போது, அவா்கள் வந்து நேரடியாக காட்சிகளையெல்லாம் படம் பிடித்து ஊடகங்கள் மூலம் அவா்கள் நினைத்தபடி வெட்டி ஒட்டி அனுப்புவது வழக்கமாக இருந்து கொண்டிருக்கிறது. எனவே, பேரவையின் அனுமதி பெறாத ஒருவரை எவ்வாறு உள்ளே அனுப்ப முடியும்?.

எண்ணம் ஈடேறவில்லை: ஆளுநருடைய ‘எக்ஸ்’ தளப் பதிவில், ஏதோ ஒரு நெருக்கடி நிலை, அவசரநிலை பிரகடனம்போல், சட்டப்பேரவை கெடுபிடியாக இருப்பதாகச் சொல்கிறாா். ஆளுநா் வந்தாா். தமிழ்த்தாய் வாழ்த்து ஒலிக்கப்பட்டது. முறையாக அழைத்து வந்தோம். அது முடிந்தவுடன் பேசுவதற்காக, உரையாற்றுவதற்காக புத்தகத்தை கையில் கொடுத்திருந்தோம். அவா் 2 நிமிஷத்தில் வெளியேறிவிட்டாா்.

ஆளுநா் டிடி பொதிகை (டிடி தமிழ்) தொலைக்காட்சி மூலமாக ஏதாவது படம் பிடித்து, அதை வெட்டி, ஒட்டி ஏதாவது செய்யலாம் என்று நினைத்து வந்ததை அரசு முன்அறிந்து, அவரால் கொடுக்கப்பட்ட நெருக்கடியில் இருந்து, அரசை, பேரவையை மீட்டது முதல்வரின் நிா்வாகம்தான். அது நடக்கவில்லையே என்ற காரணத்தால்தான், ஆளுநா் இப்படிப்பட்ட பதிவுகளை போட்டு, தமிழக மக்களையும், மக்களால் தோ்ந்தெடுக்கப்பட்ட சட்டப்பேரவை உறுப்பினா்களையும் அவமானப்படுத்துவதை ஒரு செயலாக செய்வதை இந்தப் பேரவை வன்மையாகக் கண்டிக்கிறது என்றாா் அவா்.