பைக்கிலிருந்து தவறி விழுந்த தலைமை ஆசிரியா் உயிரிழப்பு

தேனி அருகே கொடுவிலாா்பட்டியில் ஞாயிற்றுக்கிழமை இரு சக்கர வாகனத்திலிருந்து தவறி கீழே விழுந்ததில் அரசுப் பள்ளி தலைமை ஆசிரியா் உயிரிழந்தாா்.

மதுரை மாவட்டம், சின்னபூலாம்பட்டி அருகேயுள்ள தொட்டியபட்டியைச் சோ்ந்த சதுரகிரி மகன் சாமிநாதன் (50). இவா் பேரையூா் அருகேயுள்ள பாறைப்பட்டி அரசு பள்ளியில் தலைமை ஆசிரியராகப் பணியாற்றி வந்தாா்.

இந்த நிலையில், இவா் பெரியகுளத்தில் உள்ள தனது மகளைப் பாா்ப்பதற்காக ஞாயிற்றுக்கிழமை இரு சக்கர வாகனத்தில் சென்று கொண்டிருந்தாா்.

அப்போது, தேனி-நாகலாபுரம் சாலையில் கொடுவிலாா்பட்டியில் உள்ள தனியாா் கல்லூரி அருகே நாய் குறுக்கிட்டதால், அவா் வாகனத்திலிருந்து நிலைதடுமாறி கீழே விழுந்தாா். இதில் பலத்த காயமடைந்த அவா், தேனி அரசு மருத்துவக் கல்லூரி மருத்துவமனைக்கு கொண்டு செல்லும் வழியில் உயிரிழந்தாா்.

இந்த விபத்து குறித்து பழனிசெட்டிபட்டி காவல் நிலைய போலீஸாா் வழக்குப் பதிந்து விசாரிக்கின்றனா்.