இந்தியர்கள் நாடு கடத்தல்: நாடாளுமன்றத்தில் அமளி! அவைகள் ஒத்திவைப்பு!
பெரம்பலூா் அருகே 17 வயது பள்ளி மாணவியை கடத்திச்சென்று, பாலியல் துன்புறுத்தலில் ஈடுபட்ட இளைஞருக்கு 20 ஆண்டுகள் சிறை தண்டனை விதித்து, மாவட்ட மகிளா நீதிமன்றம் புதன்கிழமை தீா்ப்பு வழங்கியுள்ளது.
பெரம்பலூா் அருகேயுள்ள கல்பாடி கிராமத்தைச் சோ்ந்தவா் இளங்கோவன் மகன் நல்லதுரை (22). இவா், கடந்த 2016-ஆம் ஆண்டு பெரம்பலூரில் உள்ள தனியாா் தொழில்நுட்பக் கல்லூரியில் பயின்றபோது, பெரம்பலூரில் உள்ள தனியாா் பள்ளியில் பிளஸ்-1 படித்த 17 வயது பள்ளி மாணவியுடன் பழகியுள்ளாா். இந்நிலையில், கடந்த 18.4.2016-இல் அச் சிறுமியை கடத்திச் சென்ற நல்லதுரை புதுக்கோட்டை மாவட்டம், பொன்னமராவதியில் உள்ள ஒரு வீட்டில் அடைத்து வைத்து பாலியல் வன்கொடுமையில் ஈடுபட்டுள்ளாா்.
இதுகுறித்து பாதிக்கப்பட்ட சிறுமியின் தந்தை மருவத்தூா் காவல் நிலையத்தில் அளித்த புகாரின்பேரில், போக்ஸோ உள்ளிட்ட சட்டப் பிரிவுகளில் போலீஸாா் வழக்குப் பதிந்து நல்லதுரையை கைது செய்து சிறையில் அடைத்தனா். மேலும், கடத்திச்சென்ற சிறுமியை மீட்ட போலீஸாா் அவரது பெற்றோரிடம் ஒப்படைத்தனா்.
இவ்வழக்கு, பெரம்பலூா் மாவட்ட மகிளா நீதிமன்றத்தில் நடைபெற்றது. அரசு தரப்பில், அரசு சிறப்பு குற்றவியல் வழக்குரைஞா் சுந்தரராஜன் ஆஜரானாா். இவ் வழக்கை புதன்கிழமை விசாரித்த மகிளா நீதிமன்ற நீதிபதி இந்திராணி, சிறுமியை கடத்திச் சென்று அடைத்து வைத்து பாலியல் வன்கொடுமையில் ஈடுபட்ட நல்லதுரைக்கு 20 ஆண்டுகள் கடுங்காவல் சிறை தண்டனையும், ரூ. 60 ஆயிரம் அபராதமும், அபராதத் தொகை செலுத்த தவறினால், மேலும் 2 ஆண்டுகள் கடுங்காவல் சிறை தண்டனையும் விதித்து தீா்ப்பளித்தாா். இதையடுத்து, போலீஸாா் நல்லதுரையை அழைத்துச் சென்று திருச்சி மத்திய சிறையில் அடைத்தனா்.
