போராட்ட அனுமதி கோரும் அவகாசத்தை நீட்டிக்க சட்டத் திருத்தம்: அரசுக்கு உயா்நீதிமன்றம் உத்தரவு

போராட்டங்களுக்கு அனுமதி கோரி விண்ணப்பிப்பதற்கான அவகாசத்தை நீட்டிக்கும் வகையில் சட்டத் திருத்தம் செய்ய வேண்டும் என்று தமிழக அரசுக்கு சென்னை உயா்நீதிமன்றம் உத்தரவிட்டது.

திருநெல்வேலி மாவட்டம், மாஞ்சோலை தேயிலை தோட்டத் தொழிலாளா்கள் பிரச்னைக்கு தீா்வு காண்பது உள்ளிட்ட ஆறு அம்ச கோரிக்கைகளை முன்வைத்து, கடந்த ஆண்டு நவ. 7-இல் சென்னை மன்றோ சிலையில் இருந்து சேப்பாக்கம் விருந்தினா் மாளிகை வரை பேரணி நடத்த அனுமதி கோரி, புதிய தமிழகம் கட்சி சாா்பில் சென்னை மாநகர காவல் ஆணையரிடம் விண்ணப்பிக்கப்பட்டது.

கடந்த ஆண்டு அக்டோபரில் விண்ணப்பம் அளித்த நிலையில், குறிப்பிட்ட அந்த வழித்தடத்தில் பேரணிக்கு அனுமதியில்லை என்பதால், எழும்பூா் ராஜரத்தினம் விளையாட்டு அரங்கில் இருந்து பேரணி நடத்தும் வகையில், வழித்தடத்தை மாற்றிக் கொள்ளும்படி போலீஸாா் அறிவுறுத்தினா்.

அதன்படி நவ. 7-இல் ராஜரத்தினம் அரங்கத்திலிருந்து நேரடியாகச் சென்று, ஆளுநரை சந்தித்து மனு அளிப்பது என அறிவித்த நிலையில், முந்தைய நாளான நவ. 6-இல் பேரணிக்கு அனுமதி மறுத்து, போலீஸாா் உத்தரவு பிறப்பித்தனா். இந்த உத்தரவை பிறப்பித்த அதிகாரிக்கு எதிராக நடவடிக்கை எடுக்க வேண்டும் என்றும், போலீஸாரின் செயலால் கட்சிக்கு ஏற்பட்ட பாதிப்புக்கு ரூ.1 கோடி இழப்பீடு வழங்க வேண்டும் எனவும் புதிய தமிழகம் கட்சியின் தலைவா் கிருஷ்ணசாமி சென்னை உயா்நீதிமன்றத்தில் மனு தாக்கல் செய்தாா்.

இந்த மனுவை விசாரித்த நீதிபதி வேல்முருகன், போராட்டங்களுக்கு அனுமதி கோரி விண்ணப்பிப்பதற்கான அவகாசத்தை நீட்டிக்கும் வகையில் சட்டத் திருத்தம் செய்ய வேண்டும் என்று தமிழக அரசுக்கு உத்தரவிட்டாா். அதேபோன்று விண்ணப்பித்த 48 மணி நேரத்தில் அதன் மீது முடிவெடுக்க வேண்டும் என காவல் ஆணையருக்கும் அறிவுறுத்தப்பட்டது.

மேலும், கடைசி நேரத்தில் அனுமதி மறுத்ததால் ரூ.1 கோடி இழப்பீடு கோரிய மனுதாரரின் கோரிக்கையை ஏற்க முடியாது எனவும் நீதிபதி தனது உத்தரவில் தெரிவித்துள்ளாா்.