மயங்கி விழுந்த தனியாா் வங்கி ஊழியா் உயிரிழப்பு

திருவள்ளூா் அருகே பயணிகள் நிழற்குடை அருகே நின்றிருந்த தனியாா் வங்கி ஊழியா் மயங்கி விழுந்து உயிரிழந்தாா்.

திருவாலங்காடு அடுத்த சின்னம்மாபேட்டை கிராமத்தைச் சோ்ந்தவா் விஜய் அமிா்தராஜ் (48). இவருக்கு மனைவி சுதா, மகன் சச்சின், மகள் ஹாமனி உள்ளனா். அமிா்தராஜ் தனியாா் வங்கியில் கடந்த 6 மாதமாக பணிபுரிந்து வருகிறராம். அவ்வப்போது, பணியின் நிமித்தமாக திருவள்ளூா், காஞசிபுரம், ஸ்ரீபெரும்புதூா் ஆகிய ஊா்களுக்குச் சென்று வருவது வழக்கம்.

இதேபோல், சனிக்கிழமை பிற்பகல் வீட்டிலிருந்து புறப்பட்டு திருவள்ளூா் பகுதிக்கு வந்துள்ளாா். இந்த நிலையில், வேலையை முடித்துக் கொண்டு புட்லூா் ராமபுரம் பேருந்து நிறுத்தத்தில் திடீரென மயங்கி விழுந்தாராம்.

அப்பகுதியில் இருந்தவா்கள் அவரை மீட்டு, திருவள்ளூா் அரசு மருத்துவக் கல்லூரி மருத்துவமனைக்கு கொண்டு சென்றனா். அங்கு பரிசோதனை செய்த மருத்துவா்கள் அவா் ஏற்கெனவே உயிரிழந்துவிட்டதாகத் தெரிவித்தனா்.

இது குறித்து அவரது மனைவி சுதா திருவள்ளூா் கிராமிய காவல் நிலையத்தில் புகாா் அளித்தாா். அதன் பேரில், போலீஸாா் வழக்குப் பதிவு செய்து விசாரித்து வருகின்றனா்.