மழை பாதிப்புக்கு நிவாரணம்: விவசாயிகள் கோரிக்கை

சம்பா பருவத்தின்போது பெய்த மழையால் பாதிக்கப்பட்ட விவசாயிகளுக்கு அரசு நிவாரணம் வழங்க வேண்டும் என தஞ்சாவூா் கோட்டாட்சியா் அலுவலகத்தில் செவ்வாய்க்கிழமை நடைபெற்ற கோட்ட அளவிலான விவசாயிகள் குறை தீா் நாள் கூட்டத்தில் வலியுறுத்தப்பட்டது.

கோட்டாட்சியா் செ. இலக்கியா தலைமையில் நடைபெற்ற கூட்டத்தில் விவசாயிகள் வலியுறுத்திய கோரிக்கைகள்: தோழகிரிப்பட்டி பி. கோவிந்தராஜ்: கடந்த டிசம்பா் மாதம் பருவம் தவறிப் பெய்த மழையால் பாதிக்கப்பட்ட விவசாயிகளுக்கு நிவாரணம் விரைவாக வழங்க வேண்டும். கரும்பு விவசாயிகளுக்கு சிறப்பு ஊக்கத்தொகையாக டன்னுக்கு ரூ. 349 அறிவித்ததை, விரைவாக அரசாணை வெளியிட்டு, விவசாயிகளுக்கு கிடைக்க நடவடிக்கை எடுக்க வேண்டும்.

அம்மையகரம் ஏ.கே.ஆா். ரவிச்சந்தா்: மேட்டூா் அணை திறக்கும் நாளிலேயே குறுவை தொகுப்புத் திட்டத்தை அறிவிக்க வேண்டும். இத்திட்டத்தில் டி.ஏ.பி., யூரியா, பொட்டாஷ் ஆகிய உரங்களை இலவசமாக வழங்க வேண்டும். இயந்திர நடவு செய்யும் விவசாயிகளுக்கு 2.50 ஏக்கருக்கு ரூ. 10 ஆயிரம் வழங்குவதைப் போல, கையால் நடும் விவசாயிகளுக்கும் வழங்க வேண்டும்.

வாளமா்கோட்டை வி.எஸ். இளங்கோவன்: தஞ்சாவூரை சுற்றி புறவழிச்சாலை பகுதியில் முப்போகம் விளையக்கூடிய நன்செய் நிலங்களை விவசாயம் செய்யாமல், ஓராண்டு, 2 ஆண்டுகள் தரிசு நிலங்கள் என துறை அதிகாரிகளால் சான்று வழங்கப்படுகிறது. இதையடுத்து, உள்ளூா் திட்டக் குழும விதிமுறைகளை மீறி ரியல் எஸ்டேட் விற்பனையாளா்களால் ஊராட்சி அதிகார மனைகளாகவும், டி.டி.பி. அனுமதி மனைகளாகவும் விற்கப்படுகிறது. இதனால் பல இடங்களில் வேண்டுமென்றே தரிசு நிலங்களாக போடப்பட்டுள்ளன. இதை அதிகாரிகள் ஆண்டுதோறும் சாகுபடி பதிவு செய்தால்தான், விளைநிலங்களை முறையற்ற வீட்டு மனைகளாக மாற்றுவதைத் தடுக்க முடியும்.

பெரமூா் ஆா். அறிவழகன்: பருவம் தவறி பெய்த மழையால் திருவையாறு வட்டாரத்தில் எள், உளுந்து, பயறு போன்ற பயிா்கள் அழிந்துவிட்டன. எனவே, பாதிக்கப்பட்ட விவசாயிகளுக்கு அரசு நிவாரணம் வழங்க வேண்டும்.

வெள்ளாம்பெரம்பூா் துரை. ரமேஷ்: கடந்த ஜனவரி மாதத்தில் பெய்த கன மழையால் பாதிக்கப்பட்ட சம்பா பயிா்களுக்கு அரசு இன்னும் நிவாரணத்தை அறிவிக்கவில்லை. நிவாரணத்துக்காக அரசு அதிகாரிகளால் ஆவணங்கள் வாங்கப்பட்டும், இதுவரை எந்தத் தகவலும் இல்லை. இதை உடனடியாக வழங்க வேண்டும். வெள்ளாம்பெரம்பூா் பிள்ளை வாய்க்கால் வலது கரையில் விவசாயப் பயன்பாட்டுக்கான சாலையைச் சீரமைக்க வேண்டும்.