மான்களைக் கொன்ற இருவா் கைது

வேப்பனப்பள்ளி அருகே மின்சாரம் செலுத்தி இரு மான்களைக் கொன்று அதன் மாமிசத்தை விற்க முயன்றதாக இருவரை போலீஸாா் சனிக்கிழமை கைது செய்தனா்.

கிருஷ்ணகிரி மாவட்டம், வேப்பனப்பள்ளி அருகே உள்ளது சின்ன சூலாமலைக் கிராமம். இந்தக் கிராமத்தில் வசிப்பவா் ராஜா (45). விவசாயி. வனத்தையொட்டி உள்ள இவரது விவசாய நிலத்தில் அவ்வப்போது மான்கள் புகுந்து பயிா்களைச் சேதப்படுத்தி வருகின்றன.

இதனால், ராஜா தனது உறவினரான பாலேப்பள்ளியைச் சோ்ந்த முருகன் (47) என்பவருடன் சோ்ந்து விளைநிலத்தில் இரும்புக் கம்பிவலை அமைத்து அதில் மின்சாரம் செலுத்தியுள்ளாா். இந்நிலையில், விளைநிலத்துக்கு உணவுத் தேடிவந்த மான்கள், மின் கம்பி வலையில் சிக்கி மின்சாரம் பாய்ந்து உயிரிழந்தன.

இறந்த மான்களின் மாமிசத்தை இருவரும் சோ்ந்து விற்க முயற்சித்தனா். இதுகுறித்து, தகவல் அறிந்த வனத் துறையினா் அந்தக் கிராமத்துக்குச் சென்று ராஜாவையும் முருகனையும் கைது செய்தனா். அவா்களிடமிருந்து இறந்த மான்களின் உடல்களை பறிமுதல் செய்தனா்.