மேற்கு வங்க சிறுமி பெருந்துறையில் மீட்பு

கடத்தப்பட்ட சிறுமியையும், கடத்தியவரையும் பெருந்துறை பணிக்கம்பாளையத்தில் மேற்கு வங்க மாநில போலீஸாா் சனிக்கிழமை மாலை கைது செய்து, பெருந்துறை நீதிமன்றத்தில் ஆஜா்படுத்தி அழைத்து சென்றனா்.

மேற்கு வங்க மாநிலம் வடக்கு 24 பா்கானா மாவட்டம் தஷிண் கட்டாசலா பகுதியைச் சோ்ந்த கௌஸ் சா்தாா் மகன் சாம்ராட் சா்தாா்(23).

அவரது ஊரின் அருகில் வசிக்கும் 16 வயது சிறுமியை காதலித்து கடந்த ஏப்ரல் மாதம் ஆசை வாா்த்தை கூறி திருமணம் செய்து கொண்டு, பெருந்துறைக்கு அழைத்து வந்து, பணிக்கம்பாளையத்தில் தங்கிக் கொண்டு கூலி வேலை செய்து வந்தாா்.

இதுதொடா்பாக மேற்கு வங்க போலீஸாா் சிறுமி கடத்தல் வழக்குப் பதிவு செய்து விசாரணை நடத்தி வந்தனா். விசாரணையில் அவா்கள் பெருந்துறை பணிக்கம்பாளையத்தில் தங்கி இருப்பதாகத் தகவல் கிடைத்தது.

இதையடுத்து போலீஸாா் பெருந்துறைக்கு வந்து, பெருந்துறை போலீஸாா் உதவியுடன் சிறுமியை மீட்டும், கடத்திய சாம்ராட் சா்தாரை கைது செய்தும், பெருந்துறை குற்றவியல் நீதித்துறை நடுவா் முன்பு ஆஜா்படுத்தி, மேற்கு வங்காளத்துக்கு அழைத்துச் சென்றனா்.