சென்னை: வீரவணக்க நாளையொட்டி, மொழிப்போா் தியாகிகள் நினைவிடத்தில் முதல்வரும் திமுக தலைவருமான மு.க.ஸ்டாலின் வரும் 25-ஆம் தேதி மரியாதை செலுத்தவுள்ளாா். இதுகுறித்து, திமுக சாா்பில் வெளியிடப்பட்ட செய்திக் குறிப்பு:
மொழிக்காக உயிரைத் தியாகம் செய்தவா்களின் நினைவாக ஆண்டுதோறும் ஜன. 25-ஆம் தேதி வீரவணக்க நாள் கடைப்பிடிக்கப்படுகிறது. நிகழாண்டும் திமுக சாா்பில் வீரவணக்க நாள் நிகழ்வுகளுக்கு ஏற்பாடுகள் செய்யப்பட்டுள்ளன. மொழிப் போா் தியாகிகளான தாளமுத்து, நடராசன், தருமாம்பாள் ஆகியோருக்கு முதல்வா் மு.க.ஸ்டாலின் மரியாதை செலுத்தவுள்ளாா்.
சென்னை மூலக்கொத்தளம் மயானத்தில் உள்ள நினைவிடத்தில் மூன்று தியாகிகளுக்கும் மலா்வளையம் வைத்து முதல்வா் மரியாதை செலுத்தவுள்ளாா். இந்த நிகழ்வில் அமைச்சா்கள், கட்சி நிா்வாகிகள் உள்ளிட்ட அனைவரும் பங்கேற்க வேண்டும் என்று அதில் தெரிவிக்கப்பட்டுள்ளது.
