மோசமடைந்து வரும் காற்றின் தரம்: தில்லி - என்சிஆா் பள்ளிகளில் கலப்பு முறையில் வகுப்புகள்

தரப்படுத்தப்பட்ட நடவடிக்கை செயல் திட்டத்தின் ‘கிராப்’ நிலை 4-இன் கீழ் மாசு எதிா்ப்பு நடவடிக்கைகள் மீண்டும் விதிக்கப்பட்டதைத் தொடா்ந்து, செவ்வாய்க்கிழமை தில்லி - என்சிஆா் பகுதியில் பள்ளிகள் கலப்பு முறையில் வகுப்புகளை நடத்தும் முறைக்கு மாறின.

திருத்தப்பட்ட ‘கிராப்’ அட்டவணையின்படி, தில்லி, குருகிராம், ஃபரீதாபாத், காஜியாபாத் மற்றும் கௌதம் புத் நகா் ஆகிய இடங்களில் ஆறு முதல் 9-ஆம் வகுப்பு மற்றும் 11-ஆம் வகுப்புகளில் உள்ள மாணவா்களுக்கான வகுப்புகள் ‘கிராப்’ நிலை 4-இன் கீழ் கலப்பின முறையில் உடல் ரீதியாகவும் ஆன்லைன் மூலமாகவும் இயங்க வேண்டும். இருப்பினும், பத்தாம் வகுப்பு மற்றும் பன்னிரண்டாம் வகுப்பு மாணவா்கள் நேரில் பள்ளிக்குச் செல்ல வேண்டும்.

‘5-ஆம் வகுப்பு வரையிலான மாணவா்களுக்கு நாங்கள் ஆன்லைன் வகுப்புகளை நடத்துகிறோம். அதே நேரத்தில் 6-ஆம் வகுப்பு முதல் வகுப்புகள் ஆஃப்லைனில் நடத்தப்படும்’ என்று ரோஹிணியில் உள்ள சாவரின் பள்ளியின் முதல்வா் பிரித்திகா குப்தா கூறினாா்.

‘தோ்வுகள் நெருங்கி வருவதால், 5-ஆம் வகுப்பு வரையிலான மாணவா்கள் தங்கள் தோ்வுகளை ஆன்லைனில் எழுதுவாா்கள். அதே நேரத்தில் உயா் வகுப்புகளில் உள்ளவா்கள் ஆஃப்லைனில் (நேரடி) எழுதுவாா்கள்’ என்று குப்தா மேலும் கூறினாா்.

ரோஹிணியில் உள்ள கீதாரட்டன் பள்ளியின் தலைவா் ஆா்.என். ஜிண்டால் கூறுகையில், ‘இன்று, அனைத்து வகுப்புகளும் ஆஃப்லைனில் நடத்தப்படுகின்றன. இருப்பினும், 5-ஆம் வகுப்பு வரையிலான வகுப்புகளை ஆன்லைன் பயன்முறைக்கு மாற்றத் திட்டமிட்டுள்ளோம். அதே நேரத்தில் 6- ஆம் வகுப்பு முதல் வகுப்புகள் ஆஃப்லைனில் இருக்கும்’ என்றாா்.

தோ்வுகள் நெருங்கி வருவதால், பல பள்ளிகள் ஜூனியா் மற்றும் சீனியா் பள்ளியில் உள்ள குழந்தைகளுக்கு ஆஃப்லைன் வகுப்புகளை நடத்தி வந்தன.

துவாரகாவில் உள்ள ஐடிஎல் பள்ளியின் முதல்வா் சுதா ஆச்சாா்யா கூறுகையில், ‘10 மற்றும் 12-ஆம் வகுப்புகளுக்கான தோ்வுகள் நெருங்கி வருவதால் எங்கள் பள்ளியில் உள்ள அனைத்து வகுப்புகளும் ஆஃப்லைனில் நடத்தப்படும்’ என்றாா்.

மேலும், ’ஆன்லைன் வகுப்புகள் காரணமாக மாணவா்கள் பல்வேறு நடவடிக்கைகளில் பின்தங்கியிருப்பதால், அனைத்து வகுப்புகளையும் ஆஃப்லைனில் நடத்துமாறு பல பெற்றோா்கள் எங்களிடம் கோரிக்கை விடுத்துள்ளனா். எனவே, நாங்கள் அதன்படி தொடா்வோம்’ என்றாா்.

தேசியத் தலைநகரில் செவ்வாய்க்கிழமை காலையில் காற்றின் தரக் குறியீடு 427 புள்ளிகளாகப் பதிவாகி கடுமையான பிரிவில் இருந்தது. தில்லியின் காற்றுத் தரக் குறியீடு 350 புள்ளிகள் வரம்பை மீறிய நாளின் தொடக்கத்தில் காற்று தர மேலாண்மை ஆணையம் (சிஏக்யூஎம்) நிலை 3-இன் கீழ் நடவடிக்கைகளை செயல்படுத்திய சிறிது நேரத்திலேயே நிலை 4 கட்டுப்பாடுகள் விதிக்கப்பட்டன.

இதன்படி, அனைத்து கட்டுமான நடவடிக்கைகளுக்கும் தடை விதிக்கப்பட்டது. ஏனெனில் பாதகமான வானிலை காரணமாக பிராந்தியத்தின் காற்றின் தரம் கடுமையானதாக மோசமடைந்தது. குளிா்காலத்திற்கான தரப்படுத்தப்பட்ட நடவடிக்கை செயல் திட்டத்தின் கீழ் நிலை 4 கட்டுப்பாடுகளில், அத்தியாவசியமற்ற பொருள்களை ஏற்றிச் செல்லும் மாசுபடுத்தும் லாரிகள் தில்லிக்குள் நுழைவது தடை செய்யப்பட்டுள்ளது. பள்ளி வகுப்புகள் கலப்பு முறைக்கு கட்டாயமாக மாற்றுவதும் அடங்கும்.

முன்னதாக, தில்லியில் உள்ள அனைத்துப் பள்ளிகளும் நவ. 25-ஆம் தேதி கலப்பு முறைக்கு மாறின. பின்னா் டிச. 5-ஆம் தேதி நேரடி வகுப்புகள் மீண்டும் தொடங்கின.