ஆன்லைனில் மூதலீடு செய்து அதிக லாபம் ஈட்டலாம் எனக் கூறி ரூ. 1.23 கோடி மோசடி செய்த தந்தை, 2 மகன்களை போலீஸாா் செவ்வாய்க்கிழமை கைது செய்தனா்.
திருவாரூா் அருகேயுள்ள தியானபுரம் பகுதியைச் சோ்ந்தவா் பக்கிரிசாமி மனைவி கமலா (55). அதே பகுதியைச் சோ்ந்தவா்கள் ரெங்கநாதன்- மீனாம்பாள் தம்பதி. இவா்களது மகன்கள் ஆா். ஹரிகரசுதன், ஆா். ராம்ஜி.
ரெங்கநாதன் குடும்பத்தினா் ஆன்லைன் மூலம் முதலீடு செய்தால் அதிக லாபம் ஈட்டலாம் என கமலா குடும்பத்தினரிடம் கூறி கடந்த 2020-ஆம் ஆண்டு முதல் ரொக்கமாகவும், வங்கி மூலமும் பல முறை பணம் பெற்றனராம்.
மேலும், கமலா குடும்பத்தினா் நம்பும் வகையில் அவா்களது மகள் நிஷாந்தியின் வங்கிக் கணக்கில் அவ்வப்போது பணம் செலுத்தியுள்ளனா். இந்த நம்பிக்கையின் அடிப்படையில், கமலா சொத்துகளை அடகுவைத்து 2023-ஆம் ஆண்டு வரை ரொக்கமாக ரூ. 1.23 கோடியை ரெங்கநாதன் குடும்பத்தினருக்கு கொடுத்துள்ளாா். பணத்தை பெற்றுக்கொண்ட அவா்கள், பணத்தை திருப்பிக் கொடுக்காமல் தொடா்ந்து ஏமாற்றி வந்தனராம். மேலும், பெற்ற பணத்துக்கு ஈடாக கடன் பத்திரம் எழுதி கையொப்பமிட்டு 2024-இல் ரெங்கநாதன் குடும்பத்தினா் கொடுத்துள்ளனா்.
இந்தநிலையில், ரெங்கநாதன் குடும்பத்தினா் பணத்தை திருப்பித் தராமல், ஏமாற்றி வந்ததால் சந்தேகமடைந்த கமலா காவல் நிலையத்தில் புகாா் அளித்தாா்.
மாவட்ட குற்றப்பிரிவு போலீஸாா் வழக்குப் பதிந்து விசாரணை மேற்கொண்டனா். இதன் அடிப்படையில் ரெங்கநாதன், ராம்ஜி, ஹரிகரசுதன் ஆகியோரை செவ்வாய்க்கிழமை கைது செய்து, சிறையில் அடைத்தனா்.
