வரலாறு காணாத புதிய உச்சத்தில் தங்கம் விலை!

சென்னை: சென்னையில் ஆபரணத் தங்கத்தின் விலை புதன்கிழமை பவுனுக்கு ரூ.760 உயர்ந்து ரூ.63,240-க்கு விற்பனையாகி வரலாறு காணாத புதிய உச்சத்தை தொட்டுள்ளது.

சென்னையில் ஆபரண தங்கத்தின் விலை ஏற்ற இறக்கமாக இருந்து வரும் நிலையில், திங்கள் கிழமை பவுனுக்கு ரூ.680 குறைந்து ரூ.61,640-க்கு விற்பனையானது. செவ்வாய்க்கிழமை பவுனுக்கு ரூ.840 உயர்ந்து ரூ.62,480-க்கு விற்பனையானது.

இந்த நிலையில், புதன்கிழமை(பிப்.5) கிராமுக்கு ரூ.95 உயர்ந்து ரூ.7,905-க்கும், பவுனுக்கு ரூ.760 உயர்ந்து ரூ.63,240-க்கு விற்பனையாகிறது.

இதையும் படிக்க | தங்கத்தில் இப்போது முதலீடு சாத்தியமா?

வெள்ளி விலை நிலவரம்

அதேபோன்று வெள்ளி விலை கிராமுக்கு ரூ.1 உயர்ந்து ரூ.107-க்கும், கட்டி வெள்ளி ஒரு கிலோவுக்கு ரூ.1,000 அதிகரித்து ரூ.1,07,000-க்கு விற்பனையாகிறது.

விலை உயர்வுக்கு காரணம் என்ன?

அமெரிக்க அதிபர் டிரம்ப்பின் முக்கிய நடவடிக்கைகள், பிப்ரவரி 1 ஆம் தேதி நாடாளுமன்றத்தில் தாக்கல் செய்யப்பட்ட 2025-26-க்கான மத்திய நிதிநிலை அறிக்கையில் தங்கத்துக்கான இறக்குமதி வரி குறைப்பு குறித்த அறிவிப்பு இல்லாதது போன்ற காரணங்களால் தங்கம் விலை தொடர்ந்து உயர்ந்து வருவதாக கூறப்படுகிறது.