`வழிப்பறி முதல் போதைப்பொருள் வரை’ - குற்றச் செயல்களில் ஈடுபடும் போலீஸ் எண்ணிக்கை அதிகரிப்பா?

போதை பொருள் விற்பனையும் சிக்கிய காவலரும்!

தமிழகம் முழுவதும் போதைப் பொருள்களின் விற்பனை படுஜோராக நடந்து வருவது காவல்துறையினருக்கும் பெரும் தலைவலியாக இருந்து வருகிறது. போதை பொருள் விற்பனையைத் தடுக்க தனிப்படைகள் அமைக்கப்பட்டு அதிரடி நடவடிக்கைகள் எடுக்கப்பட்டு வருகின்றன. இந்தச் சூழலில் கடந்த சில வாரங்களுக்கு முன்பு நீலாங்கரை தனிப்படை போலீஸாரிடம் போதை பொருள் விற்கும் கும்பல் சிக்கியது. அவர்களிடம் நடத்திய விசாரணையில் சென்னை அயனாவரம் காவல் நிலையத்தில் பணியாற்றும் காவலர் பரணிக்கும் போதை பொருள் விற்பனையில் தொடர்பு இருந்த அதிர்ச்சி தகவல் தெரியவந்தது. அதைத் தொடர்ந்து நீலாங்கரை போலீஸார் காவலர் பரணியைக் கைது செய்து சிறையில் அடைத்தனர். இது தமிழக காவல்துறையில் பரபரப்பை ஏற்படுத்தியது.

காவலர் பரணியின் பின்னணி குறித்து விசாரித்தபோது அவருடன் இன்னும் சில போலீஸாருக்கு போதைப் பொருள் விற்பனையில் தொடர்பு இருப்பது தெரியவந்தது. இந்தச் சூழலில் அசோக்நகர் காவல் நிலையத்தில் பணியாற்றிய காவலர் ஜேம்ஸிக்கும் போதை பொருள் கும்பலுடன் தொடர்பு இருப்பதை போலீஸார் கண்டறிந்தனர். அதனால் போலீஸார், காவலர் ஜேம்ஸை கைது செய்து விசாரித்தனர். அவர் அளித்த தகவலின்படி மத்திய போதை பொருள் தடுப்பு பிரிவில் மாற்றுப்பணியில் பணியாற்றிய காவலர் ஆனந்த் அவரின் கூட்டாளியான இன்னொரு காவலர் சமீர் ஆகியோரை போலீஸார் கைது செய்தனர்.

போதை பொருள் கும்பலுடன் நெருங்கிய தொடர்பிலிருந்த காவலர் ஆனந்த் மூலம் அவரின் கூட்டாளிகளாக மற்ற காவலர்களுக்கும் போதை பொருள் சப்ளையானது தெரியவந்தது. அடுத்தடுத்து காவலர்கள் பரணி, ஜேம்ஸ், ஆனந்த், சமீர் என 4 போலீஸார் கைது செய்யப்பட்ட சம்பவம் சென்னை போலீஸ் கமிஷனர் அலுவலகத்தில் கடும் அதிர்ச்சியை ஏற்படுத்தியது.

யாராக இருந்தாலும் சட்டப்படி நடவடிக்கை எடுக்க கமிஷனர் அருண் உத்தரவிட்டதையடுத்து தனிப்படை போலீஸார் தொடர்ந்து விசாரித்தனர். இந்தச் சமயத்தில் சென்னை எழும்பூர் பகுதியில் காரில் போதை பொருள் கடத்திய ஒரு பெண் உள்பட இருவர் கைதாகினர். அவர்களிடம் விசாரித்தபோது டூவிலரில் வந்த ஒருவர் சென்ட்ரல் வால்டாக்ஸ் சாலையில் வைத்து போதை பொருளை விற்க கொடுத்த தகவலைத் தெரிவித்தனர். அதன்பேரில் யார் அந்த நபர் என விசாரித்தபோது டூவிலரின் ஹெல்மெட் அணிந்து வந்தவரின் அடையாளம் தெரியவந்தது. அவர், சென்னை வண்ணாரப்பேட்டை காவல் நிலையத்தில் நீதிமன்ற அலுவல் பணிகளை மேற்கொள்ளும் காவலர் அருண் பாண்டியன் எனத் தெரியவந்தது. இதையடுத்து காவலர் அருண் பாண்டியனையும் போலீஸார் கைது செய்தனர். அவரிடம் விசாரித்தபோது போதைப் பொருள் வழக்கில் பறிமுதல் செய்யப்படும் போதை பொருளை சிறுக, சிறுக விற்ற அதிர்ச்சி தகவல்கள் வெளியாகின.

இந்தச் சூழலில்தான் சென்னை அண்ணாசாலையில் 20 லட்சம் பணத்துடன் பைக்கில் சென்ற முகமது கௌசிக் என்பவரிடம் வழிப்பறி செய்த வழக்கில் திருவல்லிக்கேணி போலீஸ் சப்-இன்ஸ்பெக்டர் ராஜாசிங் மற்றும் வருமான வரித்துறை அதிகாரிகள் தாமோதரன், பிரதீப் உள்பட 4 பேர் கைது செய்யப்பட்டனர். வழிப்பறி வழக்கில் சப்-இன்ஸ்பெக்டர் ராஜாசிங் கைதானதும் அவர் பணியிடை நீக்கம் செய்யப்பட்டார். அவரின் பின்னணி குறித்து விசாரித்தபோது திருவல்லிக்கேணி காவல் நிலையத்தில் ராஜாசிங் பணியாற்றுவதற்கு முன்பு ஹவாலா பணம் அதிகளவில் கைமாறும் வடசென்னையில் அவர் பணியாற்றியிருக்கிறார். அப்போது அவருக்கு ஹவாலா கும்பலின் பின்னணி, நெட்வொர்க் குறித்த தகவல்கள் தெரிந்திருக்கின்றன. ஹவாலா கும்பல் சிக்கும்போது அவர்களையும் பணத்தையும் வருமான வரித்துறையினரிடம் போலீஸார் ஒப்படைப்பது வழக்கம். அந்தவகையில்தான் வருமானவரித்துறையினர் தாமோதரன், பிரதீப் உள்ளிட்டோருடன் சப்-இன்ஸ்பெக்டர் ராஜாசிங்குக்கு அறிமுகம் கிடைத்திருக்கிறது. ஹவலாலா கும்பலைப் பிடித்து சப்-இன்ஸ்பெக்டர் ராஜாசிங், வருமான வரித்துறையினரிடம் ஒப்படைக்கும் போது ஏன் சட்டப்படி நடவடிக்கை எடுக்க வேண்டும். டீலிங் பேசலாமா என அவர்கள் ஆலோசனை நடத்தியிருக்கிறார்கள். அதன்பிறகுதான் சென்னை அண்ணாசாலையில் ஆவணம் இல்லாமல் பணம் கொண்டு சென்ற முகமது கௌசிக் கொண்டு சென்ற பணத்தை பங்கீட்டிருக்கிறார்கள். ஆனால் முகமது கௌசிக் புகாரளித்தால் இந்த வழிப்பறி அன்கோ வசமாக சிக்கிக் கொண்டது. இவர்கள் இதுபோன்று வேறு ஏதாவது குற்றச் செயலில் ஈடுபட்டார்களா என திருவல்லிக்கேணி போலீஸார் விசாரித்து வருகிறார்கள். விசாரணையில் இன்னும் சிலருக்கு ஹவாலா வழிப்பறியில் தொடர்பு இருப்பது தெரியவந்திருக்கிறது.

வேலியே பயிரை மேய்ந்தால் என்ன செய்வது? என கலங்குவது பொதுமக்கள் தான்!