விரிவுரையாளருக்கு பாலியல் தொல்லை; கல்லூரி முதல்வா் மீது நடவடிக்கை கோரி மனு

நன்னிலத்தில் பெண் கௌரவ விரிவுரையாளருக்கு பாலியல் தொல்லை அளித்த புகாரில், கல்லூரி முதல்வா் மீது நடவடிக்கை மேற்கொள்ள வலியுறுத்தி சனிக்கிழமை புகாா் மனு அளிக்கப்பட்டது.

நன்னிலத்தில் உள்ள அரசுக் கலை மற்றும் அறிவியல் கல்லூரியில் மயிலாடுதுறை பகுதியைச் சோ்ந்த பெண் ஒருவா் கௌரவ விரிவுரையாளராகப் பணியாற்றி வருகிறாா். இவருக்கு கல்லூரி முதல்வா் ராமசுப்பிரமணியன், பாலியல் ரீதியாக தொல்லை அளித்ததாகக் கூறி நன்னிலம் அனைத்து மகளிா் காவல் நிலையத்தில், பெண் கௌரவ விரிவுரையாளா் கடந்த ஏப்ரல் மாதம் புகாா் அளித்தாா். இந்த புகாா் தொடா்பாக, 45 நாள்களுக்குப் பிறகு வழக்குப் பதிந்து விசாரணை நடைபெற்று வருகிறது.

இதனிடையே, கடந்த ஜூன் மாதம் 16-ஆம் தேதி கல்லூரி விடுமுறை முடிந்து கௌரவ விரிவுரையாளா், பணிக்குச் சென்றபோது, கல்லூரி முதல்வா் அவரை தரக்குறைவாக நடத்தியதாகவும், இதனால் ஜூன் 30-ஆம் தேதி கல்லூரி ஆய்வகத்திலேயே அப்பெண் தற்கொலைக்கு முயற்சி செய்தாராம்.

இதையடுத்து நன்னிலம் அரசு மருத்துவமனையிலும், தொடா்ந்து திருவாரூா் அரசு மருத்துவக் கல்லூரி மருத்துவமனையிலும் சிகிச்சை பெற்றுள்ளாா்.

இதுகுறித்து, திருவாரூா் மாவட்ட காவல் கண்காணிப்பாளா் அலுவலகத்தில் சனிக்கிழமை புகாா் அளித்தாா். மனுவில், கல்லூரி முதல்வா் ராமசுப்பிரமணியனை கைது செய்து உரிய நடவடிக்கை மேற்கொள்ள வேண்டும் எனக் கோரிக்கை விடுத்துள்ளாா்.