ஜூலை 9-இல் முதல்வா் திருவாரூா் வருகை: ஐஜீ ஆய்வு

திருவாரூருக்கு வரும் ஜூலை 9-ஆம் தேதி தமிழக முதல்வா் பங்கேற்க உள்ள நிகழ்ச்சி நடைபெறும் இடங்களில் மத்திய மண்டல ஐஜி சனிக்கிழமை ஆய்வு செய்தாா்.

திருவாரூா் மாவட்டத்துக்கு வரும் 9,10 தேதிகளில் தமிழக முதல்வா் மு.க. ஸ்டாலின் வருகை தர உள்ளாா். ஜூலை 9-ஆம் தேதி, பிற்பகல் காட்டூரில் உள்ள கலைஞா் கோட்டத்தில் தங்குகிறாா்.

மாலை காட்டூரில் இருந்து புறப்பட்டு, பவித்திரமாணிக்கம், துா்க்காலயா சாலை, தெற்கு வீதி பனகல் சாலை, பழைய பேருந்து நிலையம் வழியாக ரோடு ஷோ மூலம் மக்களை சந்திக்கிறாா். தொடா்ந்து, மேம்பாலம் பகுதியில் கலைஞா் கருணாநிதி சிலை திறக்கப்பட உள்ள இடத்துக்கு வருகை தர உள்ளாா்.

ஜூலை 10-ஆம் தேதி காலை எஸ்எஸ் நகரில் 10,300 பேருக்கு அரசு நலத்திட்ட உதவிகள் வழங்கும் நிகழ்ச்சியில் பங்கேற்கிறாா். இதனிடையே, இந்த நிகழ்ச்சிகள் நடைபெறும் பகுதிகளையும், கலைஞா் சிலை திறப்பு நிகழ்ச்சியின்போது பொதுமக்கள் எந்த இடத்தில் நிற்க வேண்டும், போக்குவரத்து எந்த வழியாக செல்ல வேண்டும், ரோடு ஷோ நிகழ்ச்சி எங்கு நடைபெற உள்ளது என்பது குறித்து திருச்சி மத்திய மண்டல காவல்துறைத் தலைவா் ஜோஷி நிா்மல்குமாா் ஆய்வு செய்தாா்.

தஞ்சை சரக காவல்துறை துணைத் தலைவா் ஜியாவுல் ஹக், மாவட்ட காவல் கண்காணிப்பாளா் கருண்கரட், சட்டப்பேரவை உறுப்பினா் பூண்டி கே. கலைவாணன் ஆகியோா் உடனிருந்தனா்.