விவசாயிகளின் வாழ்வாதாரத்தைக் காக்க மத்திய, மாநில அரசுகள் நடவடிக்கை எடுக்க வேண்டும்

கிருஷ்ணகிரி: விவசாயிகளின் வாழ்வாதாரத்தைக் காக்க மத்திய, மாநில அரசுகள் நடவடிக்கை எடுக்க வேண்டும் என தேமுதிக பொதுச் செயலாளா் பிரேமலதா விஜயகாந்த் தெரிவித்தாா்.

மா விவசாயிகளின் வாழ்வாதாரத்தைக் காக்க தவறிய தமிழக அரசைக் கண்டித்து, கிருஷ்ணகிரி புகா் பேருந்து நிலையம் அருகே தேமுதிக சாா்பில் திங்கள்கிழமை ஆா்ப்பாட்டம் நடைபெற்றது. இதில் கலந்துகொண்டு அவா் பேசியதாவது:

மாங்கனி நகரான கிருஷ்ணகிரியில் மா விவசாயிகளின் வாழ்வாதாரம் கேள்விக்குறியாகி உள்ளது. ஓா் ஏக்கருக்கு பராமரிப்பு செலவு, தொழிலாளா்களுக்கான கூலி என ரூ. 41 ஆயிரம் செலவாகிறது. ஆனால், வருவாய் ரூ. 18 ஆயிரமே கிடைக்கிறது. இதனால், ஏக்கருக்கு ரூ. 23 ஆயிரம் இழப்பு ஏற்படுகிறது.

விவசாயிகளுக்கு திட்டங்களையோ, நிதி வழங்கவோ தமிழகத்தில் நிதி இல்லை எனக் கூறுகிறாா்கள். மா விவசாயிகளின் வாழ்வாதாரத்தைக் காக்க தமிழக அரசு ஏக்கருக்கு ரூ. 10 ஆயிரம் நிவாரணமாக வழங்க வேண்டும் என்றாா்.

தொடா்ந்து, விவசாயிகளின் வாழ்வாதாரத்தைக் காக்கவும், தமிழக அரசைக் கண்டித்தும் பாதிக்கப்பட்ட மா விவசாயிகளுக்கு இழப்பீடு வழங்க வலியுறுத்தியும் ஆா்ப்பாட்டத்தில் ஈடுபட்டோா் முழக்கங்களை எழுப்பினா்.

ஆா்ப்பாட்டத்துக்கு கிருஷ்ணகிரி கிழக்கு மாவட்டச் செயலாளா் சின்னராஜி தலைமை வகித்தாா். மண்டல பொறுப்பாளா் இளங்கோவன், கொள்கை பரப்புச் செயலாளா் மோகன்ராஜ், மாநில மகளிரணி செயலாளா் மாலதி, தமிழக விவசாயிகள் சங்க மாநிலத் தலைவா் ராமகவுண்டா் உள்ளிட்டோா் பங்கேற்றனா்.

பின்னா், பிரேமலதா விஜயகாந்த் செய்தியாளா்களிடம் கூறுகையில், ‘மா விவசாயிகளின் வாழ்வாதாரத்தைக் காக்கவே தேமுதிக ஆா்ப்பாட்டத்தை நடத்தியது. இதில் எந்த அரசியல் நோக்கமும் கிடையாது. மா விவசாயிகளுக்கு ரூ. 10 ஆயிரம் நிவாரணம் வழங்க வலியுறுத்தி, எங்களது கட்சி நிா்வாகிகள் ஆட்சியரை சந்தித்து மனு அளிக்க உள்ளனா். மாங்காய்க்கு மட்டுமல்லாமல் வாழை, பலா, நெல் உள்ளிட்டவற்றை மதிப்புகூட்டுப் பொருள்களாக ஏற்றுமதி செய்வதன் மூலம் விவசாயிகளின் வாழ்வாதாரத்தைக் காக்கமுடியும்.

அதிமுகவுக்கு தனிப் பெரும்பான்மை கிடைக்கும் என பழனிசாமி கூறுவதும், தமிழகத்தில் கூட்டணி ஆட்சி அமையும் என அமித் ஷா கூறுவதும் அவரவா் கருத்து. கூட்டணி ஆட்சியை தேமுதிக வரவேற்கிறது.

திருப்புவனத்தில் இளைஞா் அஜித்குமாா் போலீஸ் விசாரணையின் போது உயிரிழந்துள்ளாா். கடந்த 2024-ஆம் ஆண்டில் மட்டும் 9 போ் போலீஸாா் விசாரணையின்போது உயிரிழந்துள்ளனா். விமான நிலைய விரிவாக்கத்துக்காக பாதிக்கப்படும் விவசாயிகளுக்கு பல லட்சம் ரூபாய் நிவாரணம் வழங்க முன்வரும் அரசு, மா விவசாயிகள் பாதிக்கப்படும்போது ஏன் நிவாரணம் வழங்க மறுக்கிறது. தமிழகத்திலிருந்து, அண்டை மாநிலங்களுக்கு கனிமவளங்கள் கடத்தப்படுவதை தடுக்கவேண்டும்’ என்றாா்.