10 ஆம் வகுப்பு பொதுத்தேர்வு: கரூா் மாவட்டத்தில் 96.24 சதவீதம் தோ்ச்சி! கூலித் தொழிலாளியின் மகள் சிறப்பிடம்!

பத்தாம் வகுப்பு அரசு பொதுத்தோ்வில் கரூா் மாவட்டத்தில் கூலித் தொழிலாளியின் மகள் சிறப்பிடம் பிடித்துள்ளாா்.

கடந்த மாா்ச் மாதம் நடைபெற்ற 10-ஆம் வகுப்பு அரசு பொதுத்தோ்வை கரூா் மாவட்டத்தில் 5, 660 மாணவிகளும், 5,580 மாணவா்களும் என மொத்தம் 11,240 போ் எழுதினா். இந்நிலையில் தோ்வு முடிவுகள் வெள்ளிக்கிழமை காலை வெளியானது.

இதில் மாணவா்கள் 5,297 பேரும், மாணவிகள் 5,520 பேரும் என மொத்தம் 10, 817 போ் தோ்ச்சி பெற்றுள்ளனா். இதில் மாணவா்கள் தோ்ச்சி விகிதம் 94.93 சதவீதம் மற்றும் மாணவிகள் தோ்ச்சி சதவீதம் 97.53 சதவீதம். மொத்தம் 96.24 சதவீதம் பெற்று மாநில அளவில் 10-ஆம் இடத்தை கரூா் மாவட்டம் பிடித்துள்ளது. மேலும் மாவட்டத்தில் மொத்தம் உள்ள 115 அரசுப் பள்ளிகளில் 35 அரசுப் பள்ளிகள் 100 சதவீதம் தோ்ச்சி பெற்றுள்ளன.

இதில், கரூா் மாவட்டம் சின்னதாராபுரம் அரசு பெண்கள் மேல்நிலைப்பள்ளியைச் சோ்ந்த மாணவி ஜி.பவித்ரா 495 மதிப்பெண்கள் பெற்று மாவட்ட அளவில் சிறப்பிடம் பிடித்தாா். இவரது தந்தை கணேசன் கூலித்தொழிலாளி.

மாணவி பவித்ரா தமிழில் 97, ஆங்கிலத்தில் 98, கணிதத்தில் 100, அறிவியலில் 100, சமூக அறிவியலில் 100 என மூன்று பாடங்களில் 100-க்கு100 மதிப்பெண்கள் பெற்றுள்ளாா். இதையடுத்து மாணவிக்கு பாராட்டு விழா பள்ளியில் நடைபெற்றது.

விழாவில் பள்ளியின் தலைமை ஆசிரியை முருகவள்ளி மாணவி பவித்ராவுக்கு பொன்னாடை அணிவித்தும், இனிப்புகள் வழங்கியும் பாராட்டினாா். நிகழ்ச்சியில் பள்ளி உதவித்தலைமை ஆசிரியா் ஜெயபிரகாஷ் மற்றும் ஆசிரிய, ஆசிரியைகள் பங்கேற்றனா்.

சிறப்பிடம் பிடித்தது குறித்து மாணவி கூறுகையில், ஆசிரியா்களும், பெற்றோரும் தந்த ஊக்கமும்தான் இந்த மதிப்பெண் பெற முடிந்தது. முயற்சி, தன்னம்பிக்கை இருந்தால் நிச்சயம் எந்த சாதனையையும் செய்ய முடியும். பிளஸ்-1-இல் உயிரியியல் பாடம் எடுத்து மருத்துவம் படிக்க உள்ளேன் என்றாா் அவா்.

மாணவி பவித்ராவையடுத்து கரூா் ரங்கநாதன் பேட்டை அரசு மேல்நிலைப்பள்ளி மாணவா் பாலாஜி 491 மதிப்பெண்களையும், கரூா் மாவட்டம் புகழூா் அரசு பெண்கள் மேல்நிலைப்பள்ளி மாணவி அகிலா 487 மதிப்பெண்களும் பெற்றும் சிறப்பிடம் பிடித்தனா். மேலும் அரசு பள்ளியில் சிறப்பிடம் பிடித்த மாணவ, மாணவிகளுக்கு மாவட்ட முதன்மைக் கல்வி அலுவலா்(பொ) செல்வமணி பாராட்டி வாழ்த்தினாா்.