2-ஆம் ஆண்டில் நாகை - காங்கேசன்துறை கப்பல் போக்குவரத்து

நாகை-காங்கேசன்துறைக்கு இடையேயான சிவகங்கை கப்பல் சேவையின் 2-ஆம் ஆண்டு தொடக்கத்தையொட்டி பள்ளி, கல்லூரி மாணவா்களுக்கு சிறப்பு சலுகை அறிவிக்கப்பட்டுள்ளது.

2023-ஆம் ஆண்டு அக்டோபரில் நாகை துறைமுகத்தில் இருந்து இலங்கை காங்கேசன்துறைக்கு கப்பல் சேவையை பிரதமா் நரேந்திர மோடி தொடங்கிவைத்தாா். அப்போது, போதிய பயணிகள் வராததால் செரியா பாணி எனும் கப்பல் போக்குவரத்து சேவை நிறுத்தப்பட்டது. இதையடுத்து, 2025 பிப்ரவரி 22-ஆம் தேதி சுபம் கப்பல் நிறுவனம் சாா்பில் மீண்டும் இயக்கப்பட்ட சிவகங்கை பயணிகள் கப்பல் போக்குவரத்து சேவை வாரத்தில் 6 நாள்கள் சென்றுவருகிறது.

இந்நிலையில், இந்த கப்பல் சேவை தொடங்கி ஓராண்டு நிறைவுபெற்ற நிலையில், 2-ஆம் ஆண்டு தொடக்க விழா சனிக்கிழமை நடைபெற்றது. கப்பலில் பயணிக்க துறைமுகம் சென்ற பயணிகளுக்கு மணிமாலை அணிவித்து பரிசுகளை சுபம் நிறுவன உரிமையாளா் சுந்தர்ராஜன் வரவேற்றாா். தொடா்ந்து, மும்மத பிராா்த்தனை கப்பலுக்குள் நடைபெற்றதையடுத்து குருமாா்கள் கொடியசைத்து கப்பல் போக்குவரத்து சேவையை தொடங்கிவைத்தனா்.

இதுகுறித்து சுபம் கப்பல் நிறுவன உரிமையாளா் சுந்தர்ராஜன் கூறியது: கடந்த ஓராண்டில் 20,098 போ் நாகையில் இருந்தும், காங்கேசன்துறையில் இருந்தும் பயணம் செய்துள்ளனா். கப்பலில் வரிவிலக்குடன் உயா்தர மதுபானங்கள் விற்பனை, துரித உணவு மற்றும் சிற்றுண்டிகள் விற்பனை, இலவச வைஃபை என பயணிகளை கவர சிறப்பு ஏற்பாடுகள் செய்யப்பட்டுள்ளது. இந்த கப்பல் போக்குவரத்து சேவையின் 2-ஆம் ஆண்டு தொடங்கியுள்ளது. 2-ஆண்டு தொடக்கத்தின் சலுகையாக பள்ளி, கல்லூரி மாணவா்களுக்கு 3 பகல், 2 இரவு இலங்கையில் தங்குவதற்கு கப்பல் பயணச்சீட்டு கட்டணத்தோடு ரூ.9,999 என சிறப்பு சலுகை வழங்கப்படுகிறது. மேலும், மாணவா்களை ஒருங்கிணைத்து அழைத்து வரும் 2 ஆசிரியா்களுக்கு இலவச பயணச்சீட்டு சிறப்பு சலுகைகளும் அறிவிக்கப்பட்டுள்ளன என்றாா்.