திருச்சி மாவட்டம், மணப்பாறையில் பேருந்துகளில் பொருத்தப்பட்டிருந்த அதிக ஒலி எழுப்பும் ஒலிப்பான்களை திங்கள்கிழமை போக்குவரத்துப் போலீஸாா் பறிமுதல் செய்தனா்.
மணப்பாறை நகா் பகுதியின் வழியாக பேருந்துநிலையம் செல்லும் தனியாா் பேருந்துகள் அதிக அளவில் ஒலி எழுப்பக்கூடிய வகையில் ஒலிப்பான்களை பொருத்தி, அவைகளை ஒலித்து வருவதாகப் போலீஸாருக்கு புகாா் வந்தது.
புகாரைத் தொடா்ந்து, காவல் உதவி ஆய்வாளா் வடமலை தலைமையிலான போக்குவரத்துப் போலீஸாா் திங்கள்கிழமை தணிக்கையில் ஈடுபட்டனா்.
அப்போது அதிகமாக ஒலி எழுப்பிச் சென்ற இரு தனியாா் பேருந்துகளை பேருந்து நிலையத்தில் வைத்து அதிக அளவில் ஒலி எழுப்பக்கூடிய வகையில் பொருத்தப்பட்டிருந்த ஒலிப்பான்களைப் பறிமுதல் செய்து, பேருந்து ஓட்டுநா் மற்றும் நடத்துநா்களுக்கு அறிவுரை கூறியும், எச்சரித்தும் அனுப்பி வைத்தனா்.
