திருப்பத்தூா் மாவட்ட நிா்வாகம், மாவட்ட வேலைவாய்ப்பு மற்றும் தொழில்நெறி வழிகாட்டு மையம் இணைந்து நடத்திய தனியாா் துறை வேலை வாய்ப்பு முகாமில் 442 பேருக்கு அமைச்சா் எ.வ.வேலு பணி நியமன ஆணைகளை வழங்கினாா்.
கந்திலி ஒன்றியம், ஆதியூா் ஊராட்சிக்குட்பட்ட பகுதியில் உள்ள தனியாா் பள்ளி வளாகத்தில் நடைபெற்ற முகாமுக்குஆட்சியா் க.தா்ப்பகராஜ் தலைமை வகித்தாா்.
திருவண்ணாமலை எம்பி சி.என்.அண்ணாதுரை, எம்எல்ஏ-க்கள் க.தேவராஜி(ஜோலாா்பேட்டை),அ.நல்லதம்பி(திருப்பத்தூா்),அ.செ.வில்வநாதன்(ஆம்பூா்)ஆகியோா் முன்னிலை வகித்தனா்.
பணி ஆணைகளை வழங்கி அமைச்சா் பேசியது: முதல்வா் பொறுப்பேற்றதிலிருந்து இளைஞா்களுக்கு, பட்டதாரிகளுக்கு, பொறியாளா்களுக்கு வேலைவாய்ப்பு உருவாக்கி தர வேண்டும் என ஆணையிடப்பட்டதின் தொடா்ச்சியாக தான் முகாம் நடைபெற்று வருகிறது.
இதற்கு முன்பாக பொறியாளா்கள், பட்டயம் படித்தவா்கள், ஐடிஐ முடித்தவா்கள், டிப்ளமோ படித்தவா்கள் ஆகியோா் நிறுவனத்துக்கு சென்று விண்ணப்பித்து வேலைவாய்ப்பு வாங்கும் காலம் மாறிவிட்டது.
தற்போது பல்லாயிரக்கணக்கான நபா்களுக்கு வேலைவாய்ப்பு கிடைக்கிறது. வெளிநாட்டு முதலீடுகளை ஈா்த்து அதன் மூலமாக தொழிற்சாலை உருவாக்கி அதன் மூலமாக வேலை வாய்ப்பு அளிக்க முடியும் என்று முதல்வா் நடவடிக்கை மேற்கொண்டு வருகிறாா்.
அனைவருக்கும் அரசு வேலை என்பது கற்பனை கதை, சாத்தியக்கூறு இல்லாத ஒன்று.
திருப்பத்தூா் மாவட்டத்தில் 7 வேலைவாய்ப்பு பெரிய முகாம்களில் 673 நிறுவனங்கள் பங்கு பெற்று, 20,184 நபா்கள் கலந்து கொண்டு,அதில் 3,875 நபா்களுக்கு வேலைவாய்ப்பளிக்கப்பட்டது.அதேபோல் 56 சிறிய அளவிலான வேலைவாய்ப்பு முகாமில் 397 நிறுவனங்கள் பங்குபெற்று, 7,600 நபா்கள் கலந்து கொண்டு, இதில் 2,019 நபா்களுக்கு வேலைவாய்ப்பு அளிக்கப்பட்டுள்ளது என்றாா்.
முகாமில் 2,157 நபா்கள் கலந்து கொண்டு, வேலைவாய்ப்புக்கு தோ்வு பெற்றவா்களில் 289 ஆண்கள், 138 பெண்கள் மற்றும் 15 மாற்றுத்திறனாளிகள் என ஆக மொத்தம் 442 இளைஞா்களுக்கு பணி நியமன ஆணைகள் வழங்கப்பட்டன.
இதில் மண்டல இணை இயக்குநா்(வேலைவாய்ப்பு), சேலம் ஆ.லதா, மாவட்ட ஊராட்சித் தலைவா் என்.கே.ஆா்.சூரியகுமாா், வேலைவாய்ப்பு அலுவலா் கஸ்தூரி, கந்திலி ஒன்றியக்குழு தலைவா் திருமதி, உள்ளாட்சி பிரதிநிதிகள மற்றும்; சம்பந்தப்பட்ட துறை அலுவலா்கள் பங்கேற்றனா்.
