Aman Jaiswal: பைக் மீது லாரி மோதி சின்னத்திரை நடிகர் மரணம்; படப்பிடிப்புக்கு சென்றபோது சோகம்

TV Actor Aman Jaiswal: டிவி சீரியல்களில் நடித்து வந்தவர் அமன் ஜெய்ஸ்வால் (23). இவர் தார்திபுத்ரா நந்தினி என்ற டிவி நிகழ்ச்சியில் நடித்ததன் மூலம் மிகவும் பிரபலம் அடைந்தார். அமன் மும்பையில் நேற்று மாலை படப்பிடிப்பு ஒத்திகைக்கு தனது பைக்கில் சென்று கொண்டிருந்தார்.

அவரது வாகனம் மேற்கு புறநகரில் உள்ள ஜோகேஸ்வரி நெடுஞ்சாலையில் சென்று கொண்டிருந்தபோது பின்புறமிருந்து வந்த லாரி அமன் ஜெய்ஸ்வால் சென்ற இரு சக்கர வாகனத்தின் மீது மோதிக்கொண்டது. உடனே அவர் காமா மருத்துவமனைக்கு கொண்டு செல்லப்பட்டார். ஆனால் அங்கு சிகிச்சை பலனளிக்காமல் இறந்து போனார். இது குறித்து போலீஸார் வழக்குப் பதிவு செய்து விசாரித்து வருகின்றனர்.

உத்தரப்பிரதேசத்தை சேர்ந்த அமன் ஜெய்ஸ்வால் ஆரம்பத்தில் மாடலாக தனது வாழ்க்கையைத் தொடங்கினார். பின்னர் உதாரியான் என்ற டிவி நிகழ்ச்சியில் நடித்தார். தொடர்ந்து பல்வேறு டிவி நிகழ்ச்சியில் நடித்து வந்த அமன் ஜெய்ஸ்வால் 23 வயதில் விபத்தில் மரணம் அடைந்தது, சின்னத்திரையுலகத்தை அதிர்ச்சிக்குள்ளாக்கி இருக்கிறது.

இது குறித்து இயக்குனர் தீரஜ் மிஸ்ரா வெளியிட்டுள்ள செய்தியில், "அமன் ஜெய்ஸ்வால் படப்பிடிப்பு ஒத்திகைக்கு சென்று கொண்டிருந்தபோது இரு சக்கர வாகனம் மீது லாரி மோதி விட்டது. அமன் எப்போதும் எங்களது நினைவில் இருப்பார். கடவுள் சில சமயங்களில் எவ்வளவு கொடூரமானவராக இருப்பார் என்பதை இன்று உங்கள் மரணம் எனக்கு உணர்த்தியுள்ளது" என்று குறிப்பிட்டுள்ளார்.