ஆம் ஆத்மியின் திட்டங்களை நகலெடுக்கும் பாஜக: பிரியங்கா கக்கர்

தில்லி தேர்தல் அறிக்கையில் ஆம் ஆத்மியின் திட்டங்களை பாஜக நகலெடுத்துள்ளதாக ஆம் ஆத்மி கட்சியின் தேசிய செய்தித் தொடர்பாளர் பிரியங்கா கக்கர் குற்றம் சாட்டியுள்ளார்

தேர்தலை எதிர்கொள்ளவுள்ள தலைநகர் தில்லியில் ஆம் ஆத்மி, காங்கிரஸ், பாஜக ஆகிய கட்சிகள் தீவிர பிரசாரத்தில் ஈடுபட்டுள்ளனர். கட்சிகள் தேர்தல் அறிக்கையை போட்டிப்போட்டுக் கொண்டு வெளியிட்டு வருகின்றனர்.

இந்த நிலையில் ஆம் ஆத்மியின் செய்தி தொடர்பாளர் பிரியங்கா கக்கர் செய்தியாளர்களிடம் கூறியதாவது,

தில்லியில் நலத்திட்டங்கள் தொடரும் என பாஜகவின் தனது தேர்தல் அறிக்கையில் கூறியுள்ளனர். கேஜரிவாலின் திட்டங்களை தேர்தல் அறிக்கையில் ஏற்றுக்கொண்ட போது, எங்களுடைய திட்டங்களை இலவசங்கள் என்று பிரதமர் மோடி பொய் கூறி வருகிறார். பாஜக நேற்று வெளியிட்ட தேர்தல் அறிக்கையில் பிரதமர் மோடியின் ஒப்புதல் இருக்கின்றதா? என்று அவர் கேள்வி எழுப்பினார்.

பாஜகவின் தேர்தல் அறிக்கையை அக்கட்சியின் தேசிய தலைவரும், மத்திய அமைச்சருமான ஜெ.பி. நட்டா வெள்ளிக்கிழமை வெளியிட்டார். அதில் பெண்களுக்கு மாதாந்திர நிதியுதவியாக ரூ.2,500-ம் கர்ப்பிணிகளுக்கு ரூ.25 ஆயிரமும் வழங்கப்படும் என தெரிவிக்கப்பட்டுள்ளது.

ஆம் ஆத்மி கட்சியின் தேசிய ஒருங்கிணைப்பாளர் அரவிந்த் கேஜரிவால் அறிவித்த வாக்குறுதிகளை நகலெடுத்து பாஜக பின்பற்றி வருகிறது. அவர்களுக்கு எந்தவித யோசனைகளும் தொலைநோக்கு பார்வையும் இல்லை. கேஜரிவாலின்' ஆட்சி மாதிரியை மட்டுமே பின்பற்றுவதாகவும் அவர் குற்றம் சாட்டினார்.