Aus v Ind : 'சீனியர்களின் சொதப்பல்; பன்ட்டின் விக்கெட்'- இந்திய அணியின் தோல்விக்கான அந்த 3 காரணங்கள்

பார்டர் கவாஸ்கர் தொடரின் பாக்சிங் டே டெஸ்ட்டில் இந்திய அணி வீழ்ந்திருக்கிறது. கடைசி நாளான இன்று இந்திய அணிக்கு 340 ரன்கள் இந்திய அணிக்கு டார்கெட்டாக நிர்ணயிக்கப்பட்டது. 92 ஓவர்கள் மிஞ்சியிருந்தது. நின்று ஆடி போட்டியை டிரா செய்திருக்க வேண்டும் அல்லது அட்டாக்கிங்காக ஆடி டார்கெட்டை நோக்கி முன்னேறியிருக்க வேண்டும். அந்த இரண்டையுமே இந்திய அணி செய்யவில்லை. 10 விக்கெட்டுகளையும் இழந்து 184 ரன்கள் வித்தியாசத்தில் தோல்வியை தழுவியிருக்கிறது. இந்திய அணியின் தோல்விக்கான அந்த 3 காரணங்கள் இங்கே.

சீனியர்களின் சொதப்பல்

இந்திய அணியின் முன் இன்றைக்கு இருந்தது இமாலயச் சவால். இதை சமாளிக்க இந்திய அணியின் சீனியர்களான கோலியும் ரோஹித்தும் தங்களின் முதுகில் பொறுப்பை சுமந்திருக்க வேண்டும். ஆனால், இருவருமே சொற்ப ரன்களுக்கு அவுட் ஆகி சென்றனர். முதல் இன்னிங்ஸிலுமே இவர்கள் இருவரும் ரன்னே அடிக்காமல் கையை விரித்ததுதான் பிரச்னையாகிப் போனது. இருவருமே நீண்ட அனுபவம் மிக்க பக்குவமான வீரர்கள். ஆனால், இங்கே இருவரும் செய்த தவறையே மீண்டும் மீண்டும் செய்து வருகின்றனர். இருவரும் டிபன்ஸில் திணறுகின்றனர். இருவருக்குமே டெஸ்ட் கிரிக்கெட் ஆடுகிற மனநிலையே இல்லாமல் போய் விட்டதோ என்றும் தோன்றுகிறது. ஆப் ஸ்டம்புக்கு வெளியே வீசினாலே பேட்டை விட்டு கோலி அவுட் ஆகிவிடுகிறார். அரைகுறையாக கவனமே இல்லாமல் எதோ ஷாட்டை ஆடி ரோஹித் அவுட் ஆகிவிடுகிறார்.

இருவரும் மீண்டும் மீண்டும் இதே விதத்தில் அவுட் ஆகிறார்கள் என்பதுதான் பிரச்னை. சாகச மனப்பான்மையோடு ஆடும் பண்ட்டால் தன் கையைக் கட்டிக் கொண்டு ஒரு செஷன் முழுக்க விக்கெட் விடாமல் ஆட முடியும் போது கோலியாலும் ரோஹித்தாலும் அப்படி ஆட முடியவில்லை என்பது ஆச்சர்யமாக இருக்கிறது. இருவருமே தங்களின் கரியர் சார்ந்து முக்கியமான முடிவை எடுக்க வேண்டிய கட்டத்திற்கு நகர்ந்திருக்கின்றனர்.

பன்ட்டின் `அந்த’ விக்கெட்

இந்திய அணி முதல் செஷனிலேயே 33 ரன்களுக்கு 3 விக்கெட்டுகளை இழந்திருந்தது. ஜெய்ஸ்வாலும் ரிஷப் பன்ட்டும்தான் அணியை சரிவிலிருந்து மீட்க முயன்றனர். இரண்டாவது செஷனில் இருவருமே நன்றாக ஆடினர். கடந்த இன்னிங்ஸில் 'Stupid' பட்டம் வாங்கிய பன்ட் இந்த முறை நிலைமையை உணர்ந்து சிறப்பாக ஆடினார். உணவு இடைவேளைக்குப் பிறகான அந்த செஷனில் பன்ட் பேட்டை வீச விரும்பவே இல்லை. நின்று தற்காப்பு ஆட்டம் ஆடினார். தோள்ப்பட்டையில் அடியெல்லாம் வாங்கிய போதும் விழுந்து புரண்டு ஆடும் ஷாட்டை அவர் ஆடவே இல்லை. இன்னொரு பக்கம் யாஷஸ்வி ஜெய்ஸ்வாலும் வேகமாக ரன்களை சேர்த்துக் கொண்டிருந்தார். தேநீர் இடைவேளை வரை எல்லாமே நன்றாகத்தான் சென்று கொண்டிருந்தது.

முக்கியமான பௌலர்களெல்லாம் வீசும்போது பண்ட் தற்காப்பாக ஆடுவதால், அவர் அந்த கூட்டுக்குள் இருந்து விடுவித்து பெரிய ஷாட்களை ஆட வைக்க லபுஷேன், டிராவிஸ் ஹெட் போன்றோரை கம்மின்ஸ் வீச வைத்தார். அது ஒரு பொறி. ஆனால், பண்ட் அதை சரியாக உணராமல் பெரிய ஷாட்டுக்கான தூண்டுதல் ஏற்பட்டு ஹெட்டின் பந்தில் டீப் மிட் விக்கெட்டில் கேட்ச் ஆனார். பன்ட்டின் விக்கெட்தான் ஆஸ்திரேலியாவுக்கு திருப்பு முனை. அங்கிருந்துதான் அடுத்தடுத்து வரிசையாக ஆஸ்திரேலியா விக்கெட்டுகளை வீழ்த்தியது. பண்ட் கொஞ்சம் உஷாராக இருந்திருந்தால் அல்லது நாம் ட்ராவை நோக்கி போகப்போகிறோம் என்கிற செய்தி சரியாக சொல்லப்பட்டிருந்தால், அந்த விக்கெட்டை தவிர்த்திருக்க முடியும்.

கூடுதலாக கொடுக்கப்பட்ட அந்த 60 ரன்கள்

ஆஸ்திரேலிய அணி இரண்டாவது இன்னிங்ஸில் 234 ரன்களை எடுத்திருந்தது. அதில் கடைசி விக்கெட்டுக்கு லயனும் போலண்ட்டும் இணைந்து மட்டும் 61 ரன்களை சேர்த்திருந்தனர். கிட்டத்தட்ட 20 ஓவர்களுக்கு பேட்டிங் ஆடியிருந்தனர். முக்கியமான விக்கெட்டுகளை வேகமாக வீழ்த்திய இந்திய பௌலர்களால் டெய்ல் எண்டர்களை வீழ்த்த முடியவில்லை. இவர்களை வேகமாக வீழ்த்தி 300 ரன்களுக்கு கீழே டார்கெட்டை வைத்திருந்தால், இந்தப் போட்டியில் கதையாடலே மொத்தமாக மாறியிருக்கும். இந்திய அணியை விட ஆஸ்திரேலியாவுக்குதான் அழுத்தம் அதிகமாக இருந்திருக்கும்.

எல்லா விக்கெட்டுகளையுமே பும்ராவே எடுத்துக் கொடுக்க முடியாது. அவருக்கு உதவும் வகையில் மற்ற பௌலர்களும் செயல்பட வேண்டும். இது பல சமயங்களில் நிகழாமல் போய் விடுகிறது. பௌலிங் யூனிட் மட்டுமல்ல, ஒட்டுமொத்த அணியுமே பும்ராவை மட்டுமே நம்பியிருப்பதன் விளைவு இது.

இந்திய அணியின் தோல்வி பற்றிய உங்களின் கருத்துகளை கமெண்ட் செய்யுங்கள்.!