Kamalini : 'திரில்லிங் மேட்ச்... மும்பைக்காக வின்னிங் ஷாட் அடித்த தமிழக வீராங்கனை!

வுமன்ஸ் ப்ரீமியர் லீக் தொடரின் லீக் போட்டிகள் நடந்து வருகிறது. நேற்று பெங்களூரு அணியும் மும்பை அணியும் மோதியிருந்தன. கடைசி ஓவர் வரை திரில்லாக சென்ற இந்தப் போட்டியில் தமிழக வீராங்கனை கமலினி அழுத்தமான சூழலில் வின்னிங் ஷாட் அடித்து வெல்ல வைத்தார்.

பெங்களூருவின் சின்னசாமி மைதானத்தில் நடந்த இந்தப் போட்டியில் பெங்களூரு அணி முதலில் பேட் செய்து 167 ரன்களை எடுத்திருந்தது. எல்லிஸ் பெர்ரி 87 ரன்களை எடுத்து அசத்தியிருந்தார். மும்பை அணியும் சேஸிங்கை தொடங்கியது. மும்பை அணி சார்பில் நட்சீவர் ப்ரண்ட்டும் கேப்டன் ஹர்மன்ப்ரீத் கவுரும் சிறப்பாக ஆடியிருந்தனர். நட்சீவர் ப்ரண்ட் அதிரடியாக 21 பந்துகளில் 42 ரன்களை எடுத்திருந்தார். ஹர்மன்ப்ரீத் கவுர் 38 பந்துகளில் 50 ரன்களை எடுத்திருந்தார். ஹர்மன்ப்ரீத் கவுர் நின்று போட்டியை முடித்துக் கொடுப்பார் என எதிர்பார்க்கப்பட்டது. ஆனால், கடைசி 3 ஓவர்களில் 24 ரன்கள் தேவை எனும் நிலையில் ஜார்ஜியா வாரெம் வீசிய 18 வது ஓவரில் ஹர்மன்ப்ரீத் கவுரும் சஜீவன் சஜானாவும் அடுத்தடுத்த பந்துகளில் அவுட் ஆகினர்.

இதனால் மும்பையின் மீது அழுத்தம் கூடியது. அந்த சமயத்தில்தான் நம்பர் 8 வீராங்கனையாக கமலினி உள்ளே வந்தார். களத்தில் நின்ற அமன்ஜோத் கவுரும் சிறப்பாக ஆடினார். 19 வது ஓவரில் இரண்டு சிக்சர்களை பறக்கவிட்ட அமன்ஜோத் கவுர் போட்டியை நெருக்கமாக்கினார். கடைசி ஓவரில் மும்பையின் வெற்றிக்கு 6 ரன்கள் தேவைப்பட்டது. கமலினி ஓடி ஓடி ரன்களை எடுக்க கடைசி 2 பந்துகளில் 2 ரன்கள் தேவை எனும் நிலைக்கு போட்டி சென்றது. ஏக்தா பிஸ்தா வீசிய அந்த ஓவரின் ஐந்தாவது பந்தை இறங்கி வந்து கவர்ஸில் பவுண்டரியாக்கி மும்பையை வெல்ல வைத்தார் கமலினி.

கமலினியின் பெற்றோர்களும் மைதானத்தில் இருந்தனர். 16 வயதே ஆன தங்களின் மகள் சிறப்பாக ஆடியதில் அவர்கள் பெரும் மகிழ்ச்சி அடைந்து துள்ளிக்குதித்தனர்.