Sitaare Zameen Par: "இதனால் நஷ்டம் ஏற்படலாம்; ஆனால்..." - OTTயில் படத்தை வெளியிட மறுத்த ஆமீர் கான்

பாலிவுட் நடிகர் ஆமீர் கான் நடித்த சிதாரே ஜமீன் பர் படம் வரும் 20ம் தேதி திரைக்கு வருகிறது.

இப்படத்தை ஆமீர் கான் பெரிதும் நம்பி இருக்கிறார். இதற்காகத் தொடர்ச்சியாகப் படத்தை விளம்பரப்படுத்தும் வேலையில் ஆமீர் கான் ஈடுபட்டுள்ளார்.

இப்படத்தை ஓ.டி.டி தளமான நெட்பிளிக்ஸில் வெளியிடத் தயாராக இருப்பதாக அந்நிறுவனம் தெரிவித்திருந்தது.

அதேசமயம் யூடியூப்பில் இப்படத்தைப் பணம் கொடுத்துப் பார்க்கும் வகையில் வெளியிட இருப்பதாகவும் செய்திகள் வெளியாகி இருக்கிறது.

இதையடுத்து நெட்பிளிக்ஸ் நிறுவனமும் தங்களுக்கு இப்படத்தின் டிஜிட்டல் உரிமையைக் கொடுக்கவேண்டும் என்று ஆமீர் கானிடம் கேட்டுக்கொண்டதாகக் கூறப்பட்டது.

அதோடு ஆமீர் கான் நினைத்துப் பார்க்க முடியாத அளவுக்கு டிஜிட்டல் உரிமைக்காக ரூ.125 கோடியைக் கொடுப்பதாகவும் அந்நிறுவனம் தெரிவித்ததாகவும் தகவல்கள் வெளியாகின.

ஆனால் அதனை ஆமீர் கான் திட்டவட்டமாக நிராகரித்துவிட்டதாக அவருக்கு நெருக்கமான வட்டாரங்கள் தெரிவித்துள்ளன.

படம் தியேட்டரில் மட்டுமே வெளியாகும் என்று  ஆமீர் கான் தெரிவித்துள்ளார்.

இது குறித்து ஆமீர் கான் அளித்துள்ள பேட்டியில், ''தியேட்டரில் வெளியான பிறகு என்ன நடக்கும் என்று எனக்குத் தெரியாது. அப்படத்தை வெளியிடப் பலரும் விருப்பம் தெரிவித்துள்ளனர்.

ஆனால் நான் அனைத்தையும் நிராகரித்துவிட்டேன். ஏனென்றால் நான் சினிமாவை நம்பக்கூடியவன். சினிமாவால்தான் நான் இந்த இடத்திற்கு வந்திருக்கிறேன். மக்கள் எனது படத்தை தியேட்டரில் பார்ப்பதால்தான் நான் இப்போது உங்கள் முன்னால் இருக்கிறேன்.

நான் முட்டாளாக இருக்கலாம். ஒ.டி.டி தளத்திற்கு விற்பனை செய்யாமல் நான் தவறு செய்திருக்கலாம். மிகப்பெரிய பண இழப்பு கூட ஏற்படலாம். என்ன நடக்கிறது என்பதைப் பின்னால் பார்த்துக்கொள்ளலாம்.

ஒவ்வொரு படத்தையும் பார்க்க தியேட்டருக்கு வருபவர்களின் எண்ணிக்கை குறைந்துகொண்டே செல்கிறது. எனவே அதனை அதிகரிப்பதுதான் எனது வேலை. நான் எனது ரசிகர்களையும், தியேட்டர்களையும் நம்புகிறேன்.

ஒ.டி.டி தளத்தில் விற்பனை செய்யாமல் எந்த தயாரிப்பாளரும் படத்தைத் தயாரிக்கத் தொடங்குவதில்லை. நான் மட்டும்தான் ஒ.டி.டி தளத்திற்கு விற்பனை செய்யாமல் படம் தயாரிக்கிறேன். எனக்கு அதில் விருப்பம் இல்லை'' என்று தெரிவித்துள்ளார்.

இப்படத்தில் நடிகை ஜெனிலியா தேஷ்முக், கோபி கிருஷ்ணா வர்மா உட்படப் பலரும் நடித்துள்ளனர். 

சினிமா விகடனின் பிரத்யேக Whatsapp க்ரூப்

https://chat.whatsapp.com/JSk78H7siYK4aL2qO1RglR

சினிமா தொடர்பான எக்ஸ்க்ளூசிவ் அப்டேட், அசத்தல் பேட்டிகள், டி.வி அப்டேட்கள் என எதையும் மிஸ் செய்யாமல் தெரிந்து கொள்ள...

உங்கள் வாட்ஸ் அப் மூலமே இணைந்திருங்கள் சினிமா விகடனுடன்...

https://chat.whatsapp.com/JSk78H7siYK4aL2qO1RglR