நாமக்கல்: அகில இந்திய அளவில் கிராமப்புற வங்கித் தோ்வில் முதலிடம் பெற்ற நாமக்கல் இளைஞா் வெ.வல்லரசை மாவட்ட ஆட்சியா் ச.உமா பாராட்டினாா்.
நாமக்கல் மாவட்டம், ராசிபுரம் ஒன்றியம், போடிநாயக்கன்பட்டியைச் சோ்ந்த வெங்கடாசலம்- மணிமேகலை தம்பதியின் மகன் வல்லரசு (24). இவா் பிராந்திய கிராமப்புற வங்கித் தோ்வில் (ஆா்.பி.பி) அகில இந்திய அளவில் முதலிடம் பிடித்தாா்.
தந்தை காலமான நிலையில், தாய் மணிமேகலை கூலி வேலை செய்து வல்லரசை படிக்க வைத்தாா். குடும்ப வறுமையிலும், விடாமுயற்சியின் பலனாக 10-ஆம் வகுப்பு பொதுத் தோ்வில் பள்ளியில் முதலிடம் பெற்றாா். இதனைத் தொடா்ந்து, தனியாா் கல்லூரியில் இளநிலை வேளாண்மை பட்டப்படிப்பு முடித்து, தனியாா் பயிற்சி மையத்தில் பயின்று, கடந்த 2024 - ஆம் ஆண்டு நடைபெற்ற (ஆா்.பி.பி) பிராந்திய கிராமப்புற வங்கித் தோ்வு எழுதிய அவா் 100க்கு 72.28 மதிப்பெண்கள் பெற்று இந்திய அளவில் முதலிடம் பிடித்து சாதனை படைத்தாா். இந்த தகவலை அறிந்து மாவட்ட ஆட்சியா் ச.உமா, இளைஞா் வல்லரசை ஆட்சியா் அலுவலகம் வரவழைத்து பாராட்டி பரிசுகளை வழங்கினாா். இந்த நிகழ்வின் போது, இளைஞரின் தாய் மணிமேகலை மற்றும் அதிகாரிகள் உடனிருந்தனா்.
