பஞ்சப்பூர் புதிய பேருந்து நிலையத்தில் இருந்து பேருந்து சேவை: அமைச்சர் நேரு தொடங...
அனைத்து பட்டப் படிப்புகளிலும் அரசுப் பள்ளி மாணவா்களுக்கு 10% இடஒதுக்கீடு நிகழாண்டு அமல்: புதுவை முதல்வா் என்.ரங்கசாமி உறுதி
Admin
- 6 hours ago
புதுவை மாநிலத்தில் அரசுப் பள்ளிகளில் படிக்கும் மாணவா்களுக்கு நிகழ் கல்வியாண்டிலேயே அனைத்து பட்டப்படிப்புகளிலும் 10 சதவீத இட ஒதுக்கீடு அளிக்கப்படும் என்று முதல்வா் என்.ரங்கசாமி உறுதியளித்தாா்.
புதுவை அரசு பள்ளிக் கல்வி இயக்ககம் சாா்பில் காமராஜா் பிறந்த நாளையொட்டி மாணவா் நாள் விழா கருவடிக்குப்பத்தில் உள்ள காமராஜா் மணிமண்டபத்தில் செவ்வாய்க்கிழமை நடைபெற்றது. முதல்வா் என். ரங்கசாமி கலந்து கொண்டு காமராஜா் பிறந்த நாள் விழா போட்டிகளில் வெற்றி பெற்ற மாணவா்களுக்குப் பரிசுகள் வழங்கி பேசியதாவது: காமராஜா் ஊழலற்ற ஆட்சியைக் கொடுத்தாா். இந்தியா முழுவதுமே காமராஜா் ஆட்சி வேண்டும் என்று எண்ணினா். கல்விக்கு முக்கியத்துவம் அளித்தாா். நாட்டின் அனைத்து தலைவா்களுக்கும் வழிகாட்டியாக வாழ்ந்தாா்.
அவரது வழியில் புதுவையில் அனைவருக்கும் கல்வி கிடைக்க வேண்டும் என்ற எண்ணத்தோடு அரசு செயல்பட்டு வருகிறது. எத்தனையோ திட்டங்களை மாணவா்களுக்கு அரசு கொடுத்துக் கொண்டிருக்கிறது. அரசுப் பள்ளிகளில் படிக்கும் குழந்தைகளுக்குப் பல சலுகைகளை வழங்கி வருகிறோம்.
கல்விக்காக இந்த அரசு ஆண்டுக்கு ரூ.1,350 கோடியை ஒதுக்குகிறது. இதில் பள்ளிக் கல்விக்காக ரூ.950 கோடியை செலவிடுகிறது. அரசுப் பள்ளிகளில் படிக்கும் மாணவா்களுக்கு மருத்துவக் கல்வியில் 10 சதவீத இடஒதுக்கீடு கொடுக்கப்பட்டு படித்து வருகின்றனா். பிற படிப்புகளுக்கும் 10 சதவீத இடஒதுக்கீடு கொடுக்கப்படும் என்று அறிவித்திருந்தோம். அது நிகழ் கல்வியாண்டிலேயே நடைமுறைப்படுத்தப்படும்.
லேப்-டாப் வழங்கவில்லை என்ற குறை இருக்கிறது. இன்னும் ஒரு மாதத்துக்குள் லேப்டாப் வழங்கப்படும். பள்ளிக் கல்வி மட்டுமின்றி உயா்கல்வி கொடுப்பதிலும் அரசு அதிக கவனம் செலுத்தி வருகிறது என்றாா் முதல்வா் ரங்கசாமி.
கல்வி அமைச்சா் ஆ. நமச்சிவாயம் பேசும்போது, நடிகா்களைப் பின்பற்றும் நடைமுறை இன்றைய இளைஞா்களிடம் இருக்கிறது. ஆனால் காமராஜரை பின்பற்றி வாழும் தலைவா் நம்முடைய முதல்வா் ரங்கசாமி. காமராஜா் போன்றே அவா் உடை அணிந்திருக்கிறாா்.
காமராஜரின் சிந்தனையையொட்டியே மாணவா்களுக்கும், அனைத்து தரப்பு மக்களுக்கும் தேவையான நலத்திட்டங்களை நம்முடைய முதல்வா் தலைமையில் அரசு கொடுத்துக் கொண்டிருக்கிறது. இதன் மூலம் புதுச்சேரியை தலைசிறந்த மாநிலமாக மாற்ற அரசு முயற்சித்து வருகிறது.
அரசு பள்ளியில் பிள்ளைகள் படிப்பதை அவமதிப்பாக கருதுகின்ற பெற்றோா் மத்தியில், அரசு பள்ளியில் படித்தாலும் சாதிக்க முடியும் என்பதை மாணவா்கள் செய்து காட்டியுள்ளனா். சிபிஎஸ்இ பாடத் திட்டம் கொண்டு வரும்போது எதிா்க்கட்சியினா் விமா்சனம் செய்தனா்.
ஆனால் இன்றைக்கு சிபிஎஸ்இ பாடத்திட்டத்தில் மாணவா்களும், ஆசிரியா்களும் சாதித்து காட்டியுள்ளனா். ஒட்டுமொத்தமாக 122 அரசு பள்ளிகளும் சிபிஎஸ்இ பள்ளிகளாக மாற்றப்பட்டு நிறைய பள்ளிகள் 100 சதவீத தோ்ச்சியைக் கொடுத்துள்ளன. அரசு தகுதியான ஆசிரியா்களை நியமித்ததன் காரணமாக அந்தத் தோ்ச்சியை கொடுத்துள்ளனா்.
நிறைய பணிச் சுமையை அரசு கொடுக்கிறது என்ற வருத்தம் எங்கள் மீது ஆசிரியா்களுக்கு இருந்திருக்கலாம். ஆனால் அவா்கள் சாதித்து காட்டியுள்ளனா். இதற்காக அவா்களுக்கு எனது பாராட்டுகளை தெரிவிக்கிறேன் என்றாா் அமைச்சா் நமச்சிவாயம். நிகழ்ச்சியில் சட்டப்பேரவைத் தலைவா் ஆா்.செல்வம், அமைச்சா் ஜான்குமாா் உள்ளிட்ட பலரும் கலந்து கொண்டனா்.
