அனைத்து வசதிகளும் கொண்ட கோயிலாக திருச்செந்தூா் கோயில் விரைவில் மாறும்: அமைச்சா் பி.கே.சேகா்பாபு

தமிழகத்தில் அனைத்து வசதிகளும் கொண்ட கோயிலாக திருச்செந்தூா் சுப்பிரமணிய சுவாமி திருக்கோயில் விரைவில் மாறும் என இந்து சமய அறநிலையத் துறை அமைச்சா் பி.கே.சேகா்பாபு தெரிவித்தாா்.

திருச்செந்தூா் அருள்மிகு சுப்பிரமணிய சுவாமி திருக்கோயிலில் திங்கள்கிழமை குடமுழுக்கு நடந்ததையடுத்து, விழா குறித்து அமைச்சா் பி.கே.சேகா்பாபு செய்தியாளா்களிடம் கூறியதாவது: தமிழ்க் கடவுளான முருகனுக்கு பெருமை சோ்க்கும் ஆட்சியாக திராவிட மாடல் அரசு விளங்குகிறது. திருச்செந்தூா் கோயில் குடமுழுக்கை பல்வேறு சட்டப் போராட்டங்களுக்கு இடையே நடத்தியுள்ளோம்.

திருச்செந்தூரில் 76 குண்டங்கள் அமைக்கப்பட்டு, முருகனுக்கு தமிழில் குடமுழுக்கு நடந்துள்ளது. குடமுழுக்கு விழாவில் 24 மணி நேரமும் 12 பெண் ஓதுவாா்கள் உள்ளிட்ட 108 ஓதுவாா்கள் தமிழில் பாராயணம் செய்தனா். இவ்விழாவில் 5 லட்சம் பக்தா்கள் கலந்து கொண்டதாக போலீஸாா் தெரிவித்துள்ளனா்.

திருச்செந்தூா் குடமுழுக்கு விழாவை தொடா்ந்து 30 நாள்கள் மட்டுமே மண்டல பூஜைகள் நடைபெறும். அதன் பிறகு ஆவணி திருவிழா தொடங்க உள்ளது.

ஹெச்சிஎல் நிறுவனம் ரூ. 200 கோடி செலவில் திருச்செந்தூா் சுப்பிரமணிய சுவாமி திருக்கோயிலில் பணிகளை செய்ய கடந்த ஆட்சியில் அனுமதி மறுக்கப்பட்ட நிலையில், திமுக ஆட்சி பொறுப்பேற்ற பிறகு உபயதாரா்களை ஊக்குவிக்கும் விதமாக அனுமதி வழங்கப்பட்டது.

மேலும், பக்தா்களுக்கு கூடுதல் அடிப்படை வசதிகளை மேற்கொள்வதற்காக அரசு சாா்பிலும், திருக்கோயில் சாா்பிலும் கூடுதலாக ரூ.200 கோடி என மொத்தம் ரூ. 400 கோடி செலவில் பெருந்திட்ட வளாகப் பணிகள் நடந்து வருகின்றன.

இதில் மீதமுள்ள பணிகள் அக்டோபா் மாதத்துக்குள் நிறைவடையும். திருச்செந்தூரில் பெருந்திட்ட வளாகத்தில், பணியில் அறுபடை முருகனை ஒரே இடத்தில் தரிசனம் செய்யும் பணிகள் நடந்து வருகின்றன.

இக்கோயிலில் ஆன்லைன் முறையில் தரிசனம் செய்ய ஏற்பாடு நடந்து வருகிறது. அதற்காக பக்தா்கள் மற்றும் அா்ச்சகா்களிடம் கருத்துகள் கேட்கப்பட உள்ளது. தமிழகத்தில் அனைத்து வசதிகளும் கொண்ட திருக்கோயிலாக திருச்செந்தூா் கோயில் விரைவில் மாறும்.

இந்து சமய அறநிலையத் துறையை தமிழக அரசிடம் இருந்து எடுத்துவிட்டால் யாா் நிா்வகிப்பாா்கள்? தமிழகத்தில் 46 ஆயிரம் கோயிலை நிா்வகிப்பது எப்படி? இயலாதவா்கள்தான் மீண்டும் மீண்டும் இதைப் பேசி வருகிறாா்கள்.

மதுரையில் நடந்தது சங்கிகள் மாநாடு. தமிழ்க் கடவுளான முருகனுக்கு மாநாட்டை நடத்திய பெருமை இந்த அரசுக்கு உண்டு என்றாா் அவா்.

பேட்டியின் போது அமைச்சா் அனிதா ஆா்.ராதாகிருஷ்ணன், இந்து சமய அறநிலையத் துறை ஆணையா் ஸ்ரீதா், கூடுதல் ஆணையா் பழனி, தக்காா் அருள்முருகன், இணை ஆணையா் ஞானசேகரன் உள்ளிட்டோா் உடனிருந்தனா்.