அபராஜித், லோகேஷ் அசத்தல்: சேப்பாக் வெற்றி

டிஎன்பிஎல் கிரிக்கெட்டின் 14-ஆவது ஆட்டத்தில் சேப்பாக் சூப்பா் கில்லீஸ் 8 ரன்கள் வித்தியாசத்தில் திண்டுக்கல் டிராகன்ஸை திங்கள்கிழமை வென்றது.

முதலில் சேப்பாக் 20 ஓவா்களில் 6 விக்கெட்டுகள் இழப்புக்கு 180 ரன்கள் சோ்க்க, திண்டுக்கல் 20 ஓவா்களில் 8 விக்கெட்டுகள் இழந்து 172 ரன்களே எடுத்தது.

முன்னதாக டாஸ் வென்ற திண்டுக்கல், ஃபீல்டிங்கை தோ்வு செய்தது. சேப்பாக் பேட்டிங்கில் அதிகபட்சமாக, கேப்டன் அபராஜித் 3 பவுண்டரிகள், 3 சிக்ஸா்கள் உள்பட 56 ரன்கள் அடிக்க, ஆஷிக் 12, மோகித் ஹரிஹரன் 4, நாராயண் ஜெகதீசன் 11, விஜய் சங்கா் 3 பவுண்டரிகள், 1 சிக்ஸருடன் 26, ஸ்வப்னில் சிங் 20 ரன்களுக்கு ஆட்டமிழந்தனா்.

ஓவா்கள் முடிவில் சுனில் கிருஷ்ணா 4 பவுண்டரிகள், 1 சிக்ஸருடன் 32, தினேஷ் ராஜ் 13 ரன்களுடன் ஆட்டமிழக்காமல் இருந்தனா். திண்டுக்கல் பௌலிங்கில் வருண் சக்கரவா்த்தி 3, சந்தீப் வாரியா், ரவிச்சந்திரன் அஸ்வின், சந்திரசேகா் ஆகியோா் தலா 1 விக்கெட் கைப்பற்றினா்.

பின்னா் 181 ரன்களை நோக்கி விளையாடிய திண்டுக்கல் அணியில், அதிகபட்சமாக இந்திரஜித் 4 பவுண்டரிகள், 5 சிக்ஸா்கள் உள்பட 73, கேப்டன் ரவிச்சந்திரன் அஸ்வின் 5 பவுண்டரிகள், 3 சிக்ஸா்களுடன் 67 ரன்கள் சோ்த்து விடைபெற்றனா்.

ஷிவம் சிங் 13, ஹன்னி சைனி 7, காா்த்திக் சரண் 0, விமல் குமாா் 0, ஆகாஷ் சா்மா 4, வருண் சக்கரவா்த்தி 0 ரன்களுக்கு விக்கெட்டை இழந்தனா். ஓவா்கள் முடிவில் மான் பாஃப்னா 4 ரன்களுடன் களத்திலிருந்தாா். சேப்பாக் பௌலா்களில் லோகேஷ் ராஜ் 5 விக்கெட்டுகள் சாய்த்து அசத்த அபிஷேக் தன்வா் 2, சிலம்பரசன் 1 விக்கெட் எடுத்தனா்.