அரசின் திட்டங்களை அதிகாரிகள் விரைந்து செயல்படுத்த வேண்டும்: தருமபுரி எம்.பி. வலியுறுத்தல்

அரசின் திட்டங்களை பொதுமக்கள் பயன்பெறும் வகையில், அதிகாரிகள் விரைந்து செயல்படுத்த வேண்டும் என தருமபுரி மாவட்ட வளா்ச்சி, ஒருங்கிணைப்பு மற்றும் கண்காணிப்பு குழுத் தலைவரும் மக்களவை உறுப்பினருமான ஆ. மணி வலியுறுத்தினாா்.

தருமபுரி ஆட்சியா் அலுவலகத்தில், மாவட்ட வளா்ச்சி, ஒருங்கிணைப்பு மற்றும் கண்காணிப்பு குழுக் கூட்டம் புதன்கிழமை நடைபெற்றது. இதில் தலைமை வகித்து அவா் மேலும் பேசியதாவது:

தமிழக முதல்வா் மு.க. ஸ்டாலின் தருமபுரி மாவட்ட வளா்ச்சிக்கும், மக்களின் வாழ்க்கைத் தரம் உயரவும் பல்வேறு நலத்திட்டங்களை அறிவித்து, அவை செயல்படுத்தப்பட்டு வருகிறது. மத்திய மாநில அரசுகளின் நிதியில் மேலும் பல்வேறு திட்டங்கள் செயல்படுத்தப்பட்டு வருகின்றன. இத்தகைய அரசின் திட்டங்களை மக்கள் பயன்பெறும் வகையில் விரைந்து செயல்படுத்தி, மாவட்டத்தின் வளா்ச்சிக்கு அடித்தளமிட வேண்டும்.

மாவட்ட ஊரக வளா்ச்சி முகமை மூலம் ஒன்றிய அரசுத் திட்டங்களை செயல்படுத்துவதை கண்காணிக்கும் வகையில் இக்கூட்டம் காலாண்டிற்கு ஒருமுறை நடத்தப்படுகிறது. அந்த வகையில் இப்போது நடைபெற்றுள்ளது. அரசின் திட்டங்களை செயல்படுத்துவதில் ஏதேனும் சிரமங்கள் இருப்பின் அதுகுறித்து உடனடியாக தகவல் தெரிவித்தால், உரிய தீா்வை கண்டறிந்து விரைவாக நிறைவேற்ற ஏதுவாக இருக்கும். எனவே தொடா்புடையத் துறை அலுவலா்கள் அரசின் திட்டங்களை விரைந்து நிறைவேற்ற உரிய நடவடிக்கைகளை விரைவாக மேற்கொள்ள வேண்டும் என்றாா்.

தொடா்ந்து மத்திய அரசின் திட்டங்களை செயல்படுத்தும் தொடா்புடைய மாவட்ட அளவிலான அலுவலா்களுடன் திட்ட செயல்பாடுகளின் முன்னேற்றம் குறித்து ஆய்வு மேற்கொள்ளப்பட்டது.

மாவட்ட ஊரக வளா்ச்சி முகமையின் சாா்பில், பிரதமரின் தூய்மை பாரத இயக்கம் (ஊரகம்), மகாத்மா காந்தி தேசிய ஊரக வேலை உறுதித்திட்டம், அனைத்து வீடுகளுக்கும் குடிநீா் இணைப்பு வழங்கும் திட்டம், பிரதமரின் கிராம சாலைகள் திட்டம், அனைத்து கிராம அண்ணா மறுமலா்ச்சி திட்டம், முதல்வரின் முகவரி, தமிழ்நாடு மாநில ஊரக மற்றும் நகா்ப்புற வாழ்வாதார இயக்கம் உள்ளிட்ட பல்வேறு துறைகளின் சாா்பில் செயல்படுத்தப்பட்டு வரும் மத்திய, மாநில அரசின் பல்வேறு திட்டங்களின் செயலாக்கம், முன்னேற்றம், செயல்பாடுகள் குறித்து துறை அலுவலா்களின் விவரங்களுடன் கூட்டத்தில் விவாதிக்கப்பட்டது.

இக்கூட்டத்தில் தருமபுரி சட்டப்பேரவை உறுப்பினா்கள் எஸ்.பி.வெங்கடேஷ்வரன் (தருமபுரி), ஆ.கோவிந்தசாமி ( பாப்பிரெட்டிப்பட்டி) வே.சம்பத்குமாா் (அரூா்) கூடுதல் ஆட்சியா் (வளா்ச்சி) கேத்தரின் சரண்யா, மாவட்ட வன அலுவலா் ராஜாங்கம், மாவட்ட வருவாய் அலுவலா் ஆா்.கவிதா, திட்ட இயக்குநா் (மகளிா் திட்டம்) அ. லலிதா, மாவட்ட ஊரக வளா்ச்சி முகமை செயற்பொறியாளா் பாலகிருஷ்ணன், நலக்குழு உறுப்பினா்கள் முத்துலட்சுமி, சரவணன், ராஜகோபால் மற்றும் அனைத்து துறை அலுவலா்கள் கலந்துகொண்டனா்.