ஆக்கிரமிப்பை அகற்றக்கோரி பொதுமக்கள் சாலை மறியல்

திருப்பத்தூா் அருகே ஆக்கிரமிப்பை அகற்றக்கோரி பொதுமக்கள் சாலை மறியல் போராட்டத்தில் ஈடுபட்டனா்.

திருப்பத்தூா் அருகே ராச்சமங்கலம் அடுத்த விநாயகபுரம் கிராமத்தை சோ்ந்த ஒருவா் அதே பகுதியில் உள்ள பொது இடத்தை ஆக்கிரமிப்பு செய்ததாகக் கூறப்படுகிறது. இதனால் பொதுமக்களுக்கும், போக்குவரத்துக்கும் இடையூறு ஏற்பட்டதாம்.

இந்த நிலையில் சனிக்கிழமை திடீரென அந்த இடத்தில் அவா் தடுப்புச் சுவா் கட்டினாராம். இதனால் ஆத்திரமடைந்த கிராம மக்கள் ஆக்கிரமிப்பை கண்டித்து ஞாயிற்றுக்கிழமை திருப்பத்தூா்- திருவண்ணாமலை சாலையில் மறியல் போராட்டத்தில் ஈடுபட்டனா்.

தகவல் அறிந்த திருப்பத்தூா் கிராமிய போலீஸாா் மற்றும் வட்டாட்சியா் நவநீதன் தலைமையிலான வருவாய்த் துறையினா் சம்பவ இடத்திற்கு விரைந்து வந்து சாலை மறியலில் ஈடுபட்டவா்களிடம் பேச்சு நடத்தினா். அப்போது அதிகாரிகள் சம்பந்தப்பட்ட இடத்தை ஆய்வு செய்து உரிய நடவடிக்கை எடுப்பதாகக் கூறினா். அதை ஏற்க மறுத்த கிராம மக்கள் உடனடியாக நடவடிக்கை எடுத்து ஆக்கிரமிப்பை அகற்ற வேண்டும் என கோரிக்கை விடுத்தனா்.

போக்குவரத்து பாதிப்பு... அதையடுத்து அதிகாரிகள் சம்பந்தப்பட்ட இடத்தை ஆய்வு செய்தனா். அப்போது பொது இடத்தை ஆக்கிரமிப்பு செய்தது தெரியவந்தது. இதைத் தொடா்ந்து, பொக்லைன் இயந்திரம் மூலம் ஆக்கிரமித்து கட்டப்பட்ட கட்டடம் இடித்து அகற்றப்பட்டது. பின்னா் பொதுமக்கள் போராட்டத்தை கைவிட்டு கலைந்து சென்றனா். இதனால் அந்தப் பகுதியில் போக்குவரத்து பாதிக்கப்பட்டது.