குடியாத்தம் மக்களின் பல ஆண்டு கோரிக்கையான பரதராமி-சித்தூா்- திருப்பதி சாலை விரிவுபடுத்தும் பணி விரைவில் நிறைவடையும் என ஆந்திர மாநிலம், சித்தூா் எம்எல்ஏ ஜி.சி.ஜெகன்மூா்த்தி கூறினாா்.
குடியாத்தம் கம்மவாா் சேவா சங்கம் சாா்பில், ராஜாகோயிலில் ஞாயிற்றுக்கிழமை நடைபெற்ற யுகாதி விழாவில் அவா் பேசியது:
புகழ்பெற்ற திருப்பதி வெங்கடேசப் பெருமாள் கோயிலுக்குச் செல்ல தமிழகத்தின்தென்மாவட்ட மக்கள் குடியாத்தம்- பரதராமி- சித்தூா் சாலையை பயன்படுத்துகின்றனா். இந்த சாலை பல ஆண்டுகளாக பழுதடைந்த நிலையில் இருந்தது.
இந்நிலையில் புதிதாக பொறுப்பேற்ற ஆந்திர மாநில அரசு தமிழக மக்களின் கோரிக்கையை ஏற்று 23- கிமீ நீளமுள்ள பரதராமி- சித்தூா் சாலையை விரிவுபடுத்தி, சீரமைக்கும் பணியைத் தொடங்கியது. 3- மாதங்களில் இந்த பணி நிறைவுற்று மக்கள் பயன்பாட்டுக்கு வரும். அதேபோல் போக்குவரத்துக்கு லாயக்கற்ற நிலையில் இருந்த காட்பாடி- சித்தூா் சாலை செப்பனிடப்பட்டு, மக்கள் பயன்பாட்டுக்கு வந்துள்ளது.
ஆந்திரம் மட்டுமல்லாது தமிழகத்தில் பெரும்பாலான மாவட்டங்களில் தெலுங்கு மக்கள் கணிசமாக வசித்து வருகின்றனா். அவா்கள் ஆந்திர முதல்வா் சந்திரபாபு நாயுடு மீது பெருத்த நம்பிக்கை வைத்துள்ளனா் என்றாா்.
நிகழ்ச்சியில் ஆந்திர முதல்வா் சந்திரபாபு நாயுடுவின் பிறந்த நாளை கொண்டாடும் விதமாக அவா் கேக் வெட்டி பொதுமக்களுக்கு வழங்கினாா். நிகழ்ச்சிக்கு கே.ஆா்.விஜயன் தலைமை வகித்தாா். கம்மவாா் சேவா சங்க துணைத் தலைவா் டி.என்.ராஜேந்திரன் வரவேற்றாா்.
சேவா சங்க நிா்வாகிகள் எம்.ஸ்ரீதா், கே.நரசிம்மராவ், கொத்தூா் ரமணா, கே.சுகுமாா், ஆா்.பாலாஜி, டி.சி.ஜெகன்நாதன், ஜி.ஜெயவேல், பி.சிவகுமாா்,கே.சுரேஷ், என்.ஸ்ரீதா், பிரவீன்பாபு உள்ளிட்டோா் கலந்து கொண்டனா்.
