ஆத்தூா் நகராட்சி பகுதியில் 2 நாள்களுக்கு குடிநீா் நிறுத்தம்

ஆத்தூா்: ஆத்தூா் நகராட்சி பகுதியில் செவ்வாய்க்கிழமை முதல் இரண்டு நாள்களுக்கு குடிநீா் விநியோகம் நிறுத்தப்படுகிறது என்று நகராட்சி ஆணையா் தெரிவித்துள்ளாா்.

இதுகுறித்து, ஆத்தூா் நகராட்சி ஆணையா் அ.வ.சையத் முஸ்தபா கமால் திங்கள்கிழமை வெளியிட்ட செய்திக்குறிப்பில் கூறியுள்ளதாவது:

மேட்டூா் குடிநீா் பிரதான குழாய் மராமத்துப் பணி செல்லியம்பாளையம் பகுதியில் செப். 19 ஆம் தேதியில் மேற்கொள்ள இருப்பதால் மூன்று நாள்களுக்கு குடிநீா் வழங்க இயலாது என ஆத்தூா், நரசிங்கபுரம் பகுதி மக்களுக்கு தமிழ்நாடு குடிநீா் வடிகால் வாரியத்தால் ஏற்கெனவே தெரிவிக்கப்பட்டது.

இந்த மராமத்துப் பணி, நிா்வாகக் காரணங்களால் தள்ளிவைக்கப்பட்டு, செவ்வாய்க்கிழமை (செப் 22) மேற்கொள்ள இருப்பதாக தமிழ்நாடு குடிநீா் வடிகால் வாரியத்தால் தெரிவிக்கப்பட்டுள்ளது. எனவே செப். 22 மற்றும் 23 ஆம் தேதிகளில் இரண்டு நாள்களுக்கு குடிநீா் வழங்க இயலாது எனவும், பொதுமக்கள் குடிநீரை காய்ச்சி சிக்கனமாக பயன்படுத்துமாறும் கேட்டுக்கொள்ளப்படுவதாக அவா் தெரிவித்துள்ளாா்.