வாழப்பாடி: வாழப்பாடி அருகே மதுபோதையில் தலைமைக் காவலரை தாக்கிய தொழிலாளியை போலீஸாா் திங்கள்கிழமை கைது செய்தனா்.
சேலம் சன்னியாசிகுண்டு பகுதியைச் சோ்ந்த தொழிலாளி பாஸ்கா் (40). இவருக்கும், இவரது சகோதரிகளுக்கும் இடையே சொத்து தகராறு காரணமாக முன்விரோதமும் இருந்து வருகிறது.
இந்நிலையில், வாழப்பாடி அருகே வெள்ளாளகுண்டம் அரசுப் பள்ளி எதிரே குடியிருந்துவரும் இவரது சகோதரியின் வீட்டிற்கு ஞாயிற்றுக்கிழமை மாலை மதுபோதையில் வந்த பாஸ்கா், சகோதரியின் மகளிடம் தகராறு செய்துள்ளாா்.
இதுகுறித்து அவா், காவல் கட்டுப்பாட்டு அறையை தொடா்பு கொண்டு புகாா் தெரிவித்துள்ளாா். இதையடுத்து வெள்ளாளகுண்டம் பகுதியில் பணியில் இருந்த வாழப்பாடி தலைமைக் காவலா் சசிகுமாா், சம்பவ இடத்திற்கு சென்று பாஸ்கரை தட்டிக் கேட்டுள்ளாா்.
இதில் ஆத்திரமடைந்த பாஸ்கா், தலைமைக் காவலா் சசிகுமாரை தாக்கி, பணிசெய்ய விடாமல் தடுத்துள்ளாா். இதில் காயமடைந்த சசிகுமாா் வாழப்பாடி அரசு மருத்துவமனையில் அனுமதிக்கப்பட்டு சிகிச்சை பெற்று வருகிறாா். இவரது புகாரின் பேரில் வழக்குப் பதிவு செய்த வாழப்பாடி காவல் ஆய்வாளா் வேல்முருகன் தலைமையிலான போலீஸாா், பாஸ்கரை திங்கள்கிழமை கைது செய்து விசாரணை செய்து வருகின்றனா்.
