ஆந்திரம் சென்றது புயல் சின்னம்: தமிழகத்தில் அடுத்த 6 நாள்களுக்கு மழைக்கு வாய்ப்பு

வங்கக் கடலில் உருவான புயல் சின்னம் வியாழக்கிழமை தெற்கு ஆந்திர கடலோரப் பகுதியையொட்டி நிலைக்கொண்டிருந்தது. இது மேலும் வடக்கு திசை நோக்கி நகரும் என்று எதிா்ப்பாா்க்கப்படுகிறது.

இருப்பினும் தமிழகத்தில் வெள்ளிக்கிழமை (டிச.20) முதல் டிச.25-ஆம் தேதி வரை மிதமான மழை பெய்ய வாய்ப்புள்ளதாக சென்னை வானிலை ஆய்வு மையம் தெரிவித்துள்ளது.

இது குறித்து அந்த மையம் வெளியிட்டுள்ள செய்திக் குறிப்பு:

வியாழக்கிழமை அதிகாலை நிலவரப்படி, புதுச்சேரிக்கு கிழக்கே 250 கி.மீ. தொலைவில் நிலைகொண்டியிருந்த ஆழ்ந்த காற்றழுத்த தாழ்வு பகுதி (புயல் சின்னம்), வடமேற்கு திசையில் வடதமிழகம் மற்றும் தெற்கு ஆந்திர கடலோரப் பகுதியை நோக்கி நகா்ந்தது. இது வெள்ளிக்கிழமை (டிச.20) வடக்கு திசையில், ஆந்திர கடலோரப் பகுதிகளையொட்டி நகரும் என்று எதிா்ப்பாா்க்கப்படுகிறது.

இதன் காரணமாக, தமிழகம், புதுச்சேரி மற்றும் காரைக்காலில் ஓரிரு இடங்களில் டிச.20 முதல் டிச.25-ஆம் தேதி வரை மிதமான மழை பெய்ய வாய்ப்புள்ளது. அதிகாலை நேரங்களில் ஓரிரு இடங்களில் லேசான பனிமூட்டம் காணப்படும்.

சென்னை மற்றும் புகா் பகுதிகளில் டிச.20, 21 ஆகிய தேதிகளில் மிதமான மழை பெய்ய வாய்ப்புள்ளது.

மழை அளவு (மில்லி மீட்டா்): தமிழகத்தில் வியாழக்கிழமை காலை வரை அதிகபட்சமாக சென்னை பேசின் பிரிட்ஜ் மற்றும் கத்திவாக்கத்தில் தலா 70 மி.மீ. மழை பதிவானது. பெரம்பூா், திருவொற்றியூா், தண்டையாா்பேட்டை (சென்னை), எண்ணூா் (திருவள்ளூா்) தலா 60 மி.மீ., நுங்கம்பாக்கம், ஆட்சியா் அலுவலகம், அமைந்தக்கரை (சென்னை) - தலா 50 மி.மீ. மழை பதிவானது.

திரும்பி வரும் புயல் சின்னம்: வங்கக் கடலில் நிலவும் புயல் சின்னம் டிச.21-ஆம் தேதி நெல்லூருக்கு கிழக்கே நிலைக்கொண்டிருக்கும். அதே நேரத்தில், ஆந்திர கடல் பகுதிக்கு மேல் உயா் அழுத்தம் இருப்பதால், புயல் சின்னம் மேலும் வடக்கு நோக்கி நகர வாய்ப்பில்லை. எனவே, இது மீண்டும் தமிழக கடற்கரையை நோக்கி திரும்பி டிச.22-ஆம் தேதி சென்னைக்கு அருகே வரும் என எதிா்பாா்க்கப்படுகிறது என்று தெரிவிக்கப்பட்டுள்ளது.