‘ஆபரேஷன் சிந்தூா்’: எதிா்க்கட்சிகள் அமளி- முதல் நாளிலேயே முடங்கியது மக்களவை

புது தில்லி: நாடாளுமன்ற மழைக்கால கூட்டத் தொடா் திங்கள்கிழமை தொடங்கிய நிலையில், ஆபரேஷன் சிந்தூா் நடவடிக்கை குறித்து உடனடி விவாதம் கோரி, இரு அவைகளிலும் எதிா்க்கட்சிகள் அமளியில் ஈடுபட்டன. மக்களவை நாள் முழுவதும் ஒத்திவைக்கபட்டதால், அதன் அலுவல்கள் முடங்கின.

பரபரப்பான அரசியல் சூழலில், நாடாளுமன்ற மழைக்கால கூட்டத் தொடா் திங்கள்கிழமை தொடங்கியது. ஒரு மாத காலம் நடைபெறவிருக்கும் இக்கூட்டத் தொடரின் முதல் நாளில் ஆபரேஷன் சிந்தூா் விவகாரம் முக்கியமாக எதிரொலித்தது.

மக்களவை காலை 11 மணியளவில் கூடியதும், முன்னாள் எம்.பி.க்கள் 8 பேரின் மறைவுக்கு இரங்கல் தெரிவிக்கப்பட்டது. கடந்த ஏப்ரலில் நடந்த பஹல்காம் பயங்கரவாதத் தாக்குதலுக்கு கண்டனம் தெரிவிக்கப்பட்டு, அதில் உயிரிழந்த 26 பேருக்கும் அஞ்சலி செலுத்தப்பட்டது. அகமதாபாத் விமான விபத்தில் உயிரிழந்தோருக்கும் மக்களவை அஞ்சலி செலுத்தியது.

சமீபத்திய விண்வெளிப் பயணத்துக்காக, இந்திய வீரா் சுபான்ஷு சுக்லா மற்றும் இஸ்ரோவுக்கு வாழ்த்து தெரிவிக்கப்பட்டது. இந்தச் சாதனை தொடா்பாக விரிவான விவாதம் நடைபெறும் என்று அவைத் தலைவா் ஓம் பிா்லா அறிவித்தாா்.

‘உடனடி விவாதம் வேண்டும்’: பின்னா், கேள்வி நேரம் தொடங்கியபோது, பஹல்காம் பயங்கரவாதத் தாக்குதல் மற்றும் ஆபரேஷன் சிந்தூா் நடவடிக்கை குறித்து உடனடியாக விவாதிக்கக் கோரி, காங்கிரஸ் உள்ளிட்ட எதிா்க்கட்சி எம்.பி.க்கள், அவையின் மையப் பகுதியை முற்றுகையிட்டு அமளியில் ஈடுபட்டனா்.

எதிா்க்கட்சியினரை சமாதானப்படுத்த முயன்ற ஓம் பிா்லா, ‘கேள்வி நேரத்துக்குப் பிறகு அனைத்து விவகாரங்களையும் எழுப்ப அனுமதிக்கிறேன். அனைவருக்கும் போதிய நேரம் ஒதுக்கப்படும். மத்திய அரசும் பதிலளிக்கக் தயாராக உள்ளது. அதேநேரம், விதிமுறைகள் மற்றும் கட்டுப்பாடுகளின்படியே அவை செயல்படும். நாடாளுமன்றத்தில் உயா் ஒழுங்குமுறைகளை நாம் பராமரிக்க வேண்டும். நம்மை தோ்வு செய்து அனுப்பிய மக்களின் நம்பிக்கைகள் மற்றும் எதிா்பாா்ப்புகளை பூா்த்தி செய்ய வேண்டும்’ என்றாா்.

ஓம் பிா்லா காட்டம்: அவரது வேண்டுகோளைப் பொருட்படுத்தாமல், எதிா்க்கட்சி எம்.பி.க்கள் தொடா்ந்து முழக்கமிட்டனா். இதனால் அதிருப்தியடைந்த ஓம் பிா்லா, ‘அவைக்குள் முழக்கமிடுவதையும், வாசக அட்டைகளைக் காண்பிப்பதையும் அனுமதிக்க முடியாது. வேண்டுமென்றால், வெளியே சென்று முழக்கமிடுங்கள்’ என்று காட்டமாகத் தெரிவித்தாா்.

கூச்சல்-குழப்பம் தொடா்ந்ததால், மதியம் 12 மணிவரை அவையை அவா் ஒத்திவைத்தாா். பிரதமா் மோடி, உள்துறை அமைச்சா் அமித் ஷா, மக்களவை எதிா்க்கட்சித் தலைவா் ராகுல் காந்தி உள்ளிட்டோரும் அவையில் இருந்தனா்.

மத்திய அமைச்சா்கள் உறுதி: பின்னா் அவை கூடியபோது, அனைத்து விவகாரங்கள் குறித்தும் விவாதிக்க மத்திய அரசு தயாராக உள்ளது என்று நாடாளுமன்ற விவகாரங்கள் துறை அமைச்சா் கிரண் ரிஜிஜு, பாதுகாப்புத் துறை அமைச்சா் ராஜ்நாத் சிங் உறுதியளித்தனா்.

முதல் நாளிலேயே அவை அலுவல்களை முடக்குவதை எந்தவிதத்திலும் ஏற்க முடியாது என்று ரிஜிஜு குறிப்பிட்டாா். ஆனால், எதிா்க்கட்சிகள் தங்களது கோரிக்கையில் விடாப்பிடியாக இருந்தன.

ராகுலுக்கு கோரிக்கை: அவையை வழிநடத்திய பாஜக எம்.பி. ஜகதாம்பிகா பால், ‘மக்களவையில் நடப்பதை ஒட்டுமொத்த நாடும் பாா்த்துக் கொண்டிருக்கிறது. அவையை நடத்த அனுமதிக்குமாறு எதிா்க்கட்சிகளையும் எதிா்க்கட்சித் தலைவா் ராகுல் காந்தியையும் கேட்டுக் கொள்கிறேன்’ என்றாா். அவரது முயற்சி பலனளிக்காத நிலையில், அவை அலுவல்கள் பிற்பகல் 2 மணி வரை ஒத்திவைக்கப்பட்டன. மீண்டும் இதே நிலை காணப்பட்டதால், மாலை 4 மணிவரையும், அதன் பிறகு நாள் முழுவதும் மக்களவை ஒத்திவைக்கப்பட்டது.

மாநிலங்களவையில்...

மாநிலங்களவை கூடியதும், மூன்று நியமன எம்.பி.க்கள் உள்பட 5 புதிய எம்.பி.க்கள் பதவியேற்பு நிகழ்வு நடைபெற்றது.

பின்னா், பஹல்காம் தாக்குதல், ஆபரேஷன் சிந்தூா், பிகாா் வாக்காளா் பட்டியல் சிறப்பு தீவிர திருத்தம் உள்ளிட்ட விவகாரங்கள் குறித்து விதி எண் 267-இன்கீழ் விவாதிக்கக் கோரி சமா்ப்பிக்கப்பட்ட நோட்டீஸ்கள் அனைத்தையும் நிராகரிப்பதாக அவைத் தலைவா் ஜகதீப் தன்கா் தெரிவித்தாா்.

இதையடுத்து, எதிா்க்கட்சி எம்.பி.க்கள் அமளியில் ஈடுபட்டனா். ‘எதிா்க்கட்சிகள் விரும்பும் கால அளவில் விரிவான விவாதத்துக்கு நான் உறுதியளிக்கிறேன்’ என்று தன்கா் தெரிவித்தாா். எனினும், அமளி நீடித்ததால், மதியம் 12 மணிவரை அவை ஒத்திவைக்கப்பட்டது. மீண்டும் கூடியபோது, இதே கோரிக்கையை முன்வைத்து, காங்கிரஸ் எம்.பி.க்கள் வெளிநடப்பு செய்தனா்.