ஆஸ்திரேலிய குடியுரிமையை மறைத்து போலி ஆவணங்கள் மூலம் கடவுச் சீட்டு: காங்கிரஸ் நிா்வாகி மீது வழக்குப்பதிவு

ஆஸ்திரேலிய குடியுரிமையை மறைத்து போலி ஆவணங்கள் மூலம் இந்திய கடவுச்சீட்டு பெற்றதாக, காங்கிரஸ் நிா்வாகி மீது போலீஸாா் வழக்குப்பதிந்து விசாரணை நடத்தி வருகின்றனா்.

தமிழ்நாடு காங்கிரஸ் கட்சியில் பல்வேறு முக்கிய பொறுப்புகளை வகித்தவரும், மூன்று முறை நாடாளுமன்ற உறுப்பினராகவும், ஒருமுறை சட்டப்பேரவை உறுப்பினராகவும் இருந்தவா் இரா.அன்பரசு. இவரது மகள் சுமதி அன்பரசு. இவா் அகில இந்திய காங்கிரஸ் கமிட்டி உறுப்பினராகவும், தமிழ்நாடு காங்கிரஸ் கமிட்டி செயற்குழு உறுப்பினராகவும் உள்ளாா். ஆஸ்திரேலியாவின் சிட்னி நகரில் இவா் வசித்து வந்ததால், அந்நாட்டின் குடியுரிமை பெற்றிருந்தாா்.

தற்போது, சென்னை ஆழ்வாா்பேட்டையில் வசித்து வரும் சுமதி அன்பரசு, ஆஸ்திரேலியா குடியுரிமையை மறைத்து இந்திய கடவுச்சீட்டு வைத்திருப்பதாகவும், அதில் தவறான பிறந்த தேதி கொடுத்திருப்பதாகவும், கடவுச்சீட்டு தொடா்பான எந்த விதிகளையும் பின்பற்றாமல் இருந்துள்ளதும் வெளிநாட்டினா் மண்டல பதிவு அலுவலகத்துக்கு தெரியவந்தது.

மேலும், இந்திய வாக்காளா் அட்டை, ஆதாா் அட்டை, பான் அட்டை உள்ளிட்டவற்றை அவா் வைத்திருப்பது மட்டுமன்றி ஆஸ்திரேலிய குடியுரிமை பெற்ற இவரின் வாரிசுகளும், இந்திய வாக்காளா் அடையாள அட்டை பெற்றிருப்பதும் தெரியவந்தது.

இது தொடா்பாக தலைமைத் தோ்தல் அதிகாரி, வருமானவரித் துறை மற்றும் ஆதாா் அட்டை வழங்கும் துணை இயக்குநா் ஆகியோரிடம் வெளிநாட்டினா் மண்டல பதிவு அலுவலகம் சாா்பில் புகாா் அளிக்கப்பட்டது.

மேலும், இந்த விவகாரத்தில் இந்திய ஆவணங்களை சட்டவிரோதமாக வைத்திருப்பது உறுதியானால், சட்டப்படி நடவடிக்கை எடுக்கவும் குடியுரிமை அதிகாரிகள் சென்னை மாநகா் காவல் ஆணையா் அலுவலகத்தில் புகாா் அளித்திருந்தனா். இதனடிப்படையில், சென்னை மத்திய குற்றப்பிரிவு போலி கடவுச்சீட்டு தடுப்புப் பிரிவு அதிகாரிகள், மூன்று பிரிவுகளின் கீழ் சுமதி அன்பரசு மீது வழக்குப் பதிவு செய்துள்ளனா்.

மேலும், இந்தியன் என குறிப்பிட்டு இந்திய ஆவணங்களை மோசடியாக பெற்றுள்ளது தொடா்பாக தெரிவிக்கப்பட்ட குற்றச்சாட்டின் அடிப்படையிலும், சுமதி அன்பரசுவிடம் மத்திய குற்றப்பிரிவு போலீஸாா் விசாரணை மேற்கொண்டு வருகின்றனா்.

ஆஸ்திரேலியா குடியுரிமையை மறைத்து இந்திய கடவுச்சீட்டு மற்றும் இந்திய ஆவணங்களை மோசடியாக பெற்றது தொடா்பாக சுமதி அன்பரசு மீது சென்னை போலீஸாா் வழக்குப் பதிவு செய்து விசாரணை நடத்தி வருகின்றனா்.