சிறை, கடவுள் நம்பிக்கை, பேராசிரியர் - ஒரு புத்தகக் கடைக்காரரின் கதை 6
ஜி.எஸ்.டி... அறிமுகப்படுத்தப்பட்டதிலிருந்தே நாளொரு சர்ச்சைதான். சிகரெட், புகையிலை, கார்பனேட்டட் குளிர்பானங்கள் உள்ளிட்ட ஆடம்பர மற்றும் பாவப் பொருள்களுக்கான (Sin Goods) ஜி.எஸ்.டி... 28%-லிருந்து 35%-ஆக உயர்த்த பரிந்துரைக்கப்பட்டிருப்பதுதான் இப்போதைய புதிய சர்ச்சை!
‘நடுத்தர மக்களுக்குச் சுமையாக மாறும், நாட்டின் வளர்ச்சி பாதிக்கும்’ என்றெல்லாம் ஒருதரப்பினர் விமர்சிக்க, சமூக வலைதளங்களில் இந்திய அளவில் டிரெண்டிங் ஆகியிருக்கிறது 35% ஜி.எஸ்.டி.
அதேசமயம், ‘இந்த வரி உயர்வானது, மக்களின் ஆரோக்கியம் மற்றும் சுற்றுச்சூழலுக்கு பாதிப்பை ஏற்படுத்தக்கூடிய பொருள்களுக்கே. இதனால், நுகர்வு குறைந்தால், மக்களின் ஆரோக்கியமும் சூழலும் மேம்படும்... அவர்களுடைய பணமும் மிச்சமாகும்’ என்று மற்றொரு தரப்பு ஆதரவு கொடி பிடிக்கிறது.
‘10,000 ரூபாய்க்குக் குறைவான விலையுள்ள சைக்கிள்கள், மாணவர்களுக்கான நோட்டுப் புத்தகங்களுக்கு 12% ஜி.எஸ்.டியை 5% ஆகவும், டேர்ம் மற்றும் ஹெல்த் இன்ஷூரன்ஸ் பிரீமியம், 20 லிட்டர் குடிநீருக்கான ஜி.எஸ்.டி 18%-லிருந்து 5% ஆகவும் குறைக்கச் சொல்லி கடந்த அக்டோபரில் நடந்த கூட்டத்தில் பரிந்துரைத்ததையும் கவனிக்க வேண்டும்’ என்கிறார்கள் இவர்கள்.
அரசின் நோக்கம் 100% தூய்மையாக இருக்கும்பட்சத்தில், விமர்சனங்களைக் கடந்து இதை நடைமுறைப்படுத்துவதில் தவறில்லை. ஆனால், நோக்கம் நிச்சயம் நிறைவேற முன்னெடுப்புகளை கையில் எடுக்க வேண்டும்.
சில ஆண்டுகளுக்கு முன்பு, வருமான வரி என்பதையே நீக்கிவிட்டு, நுகர்வு பொருள்களுக்கான வரி என்பதை மட்டுமே முன்னெடுக்கலாம் என்கிற யோசனை முன்வைக்கப்பட்டது. வரி ஏய்ப்பு தொடர்கதையாகவே இருப்பதுதான், காரணம்.
140 கோடி பேர் இருக்கும் நாட்டில்... 2 கோடி பேர் மட்டும்தான் வரி செலுத்து கிறார்கள் (2022-23 நிதிஆண்டு). உண்மையில், பணக்காரர்களைக் கணக்கெடுத்தால், இன்னும் பல கோடி பேர் பட்டியலுக்குள் வந்துவிடுவார்கள். ஆனால், சட்டத்தில் உள்ள ஓட்டைகளைப் பயன்படுத்தித் தப்பிக்கொண்டுள்ளனர்.
இதை வைத்துதான், ‘வருமான வரியை ஏமாற்றிவிட முடியும். ஆனால், நுகர்வோர் என்கிற வகையில் வாங்கும் பொருள்களுக்கு வரி செலுத்தியே ஆக வேண்டும். ஆடம்பர மற்றும் உடல் ஆரோக்கியத்தைக் கெடுக்கும் பொருள்களை வசதிக்கேற்ப வாங்கிக் குவிப்பவர்கள், அதற்கேற்ப வரியைக் கட்டினாலே போதும்... பல மடங்கு பணம் அரசாங்க கஜானாவில் குவியும்’ என்கிற யோசனை முன்வைக்கப்பட்டது.
ஆக, இப்போதைக்கு அத்தியாவசிய பொருள்களுக்குக் குறைவான வரியும், ஆடம்பர, பாவப் பொருள்களுக்கு அதிகமான வரியும் விதிக்க முனைந்திருப்பது சரியானதே! வரி வருவாயும் முக்கியம், வளர்ச்சியும் முக்கியம், மக்களின் நலனும் முக்கியம் அனைத்தையும் சமநிலையில் வைத்திருக்கும் வகையில் கொள்கைகளை வகுப்பதே நல்லரசுக்கு அடையாளம்!
- ஆசிரியர்
