இரவு நேரங்களில் அரசு மருத்துவமனைகளில் அவசர சிகிச்சை: திருவள்ளூா் ஆட்சியா் அறிவுறுத்தல்

திருவள்ளூா் மாவட்டத்தில் அரசு மருத்துவமனைகளில் இரவு நேரங்களில் வரும் நோயாளிகளுக்கு உரிய முறையில் அவசர சிகிச்சை அளிக்க வேண்டும் என ஆட்சியா் த.பிரபுசங்கா் அறிவுறுத்தினாா்.

திருவள்ளுா் ஆட்சியா் அலுவலகத்தில் மாவட்ட அளவிலான மருத்துவக் கல்லூரி மருத்துவமனை, அரசு மருத்துவமனைகள் மற்றும் அரசு ஆரம்ப சுகாதார நிலையங்களுக்கான ஆய்வு கூட்டம் நடைபெற்றது. கூட்டத்துக்கு ஆட்சியா் த.பிரபுசங்கா் தலைமை வகித்தாா்.

அப்போது, அரசு மருத்துவமனைகள், அரசு மருத்துவக் கல்லூரி மருத்துவமனைகள் மற்றும் அரசு ஆரம்ப சுகாதார நிலையங்களின் செயல்பாடுகள் சிறப்பாக இருக்க வேண்டும்.

மேலும், புறநோயாளிகள் சிகிச்சை, உள் நோயாளிகள் சிகிச்சை, அறுவை சிகிச்சை, முட நீக்கியல் அறுவை சிகிச்சை, மகப்பேறு அறுவை சிகிச்சைகள், குழந்தைகள் நல சிகிச்சை ஆகியவைகள் குறித்த விவரங்களை கேட்டறிந்தாா்.

மருத்துவமனைகளில் எக்ஸ்ரே நுண்கதிா் சேவை, அல்ட்ராசோனோகிராம் சேவை மற்றும் ஆய்வக சேவைகள் தொடா்பாகவும் ஆய்வு மேற்கொள்ளப்பட்டது. அதோடு அனைத்து மருத்துவமனைகளிலும் மருத்துவ சேவைகளை குறைவின்றி வழங்க வேண்டும். அதிலும் இரவு நேரங்களில் அவசர சிகிச்சை தேவைப்படும் நோயாளிகளுக்கு உரிய முறையில் வழங்க வேண்டும். மகப்பேறு, மகளிா் நலன் மற்றும் குழந்தைகளுக்கான சிகிச்சைகளில் சிறப்பு கவனம் செலுத்த வேண்டும் என அறிவுறுத்தினாா்.

ஆய்வுக் கூட்டத்தில் அரசு மருத்துவ கல்லூரி முதல்வா் ரேவதி, உதவி ஆட்சியா் பயிற்சி ஆயுஷ் குப்தா, மாவட்ட சுகாதார அலுவலா்கள் ப.பிரியாராஜ் (திருவள்ளூா்) பிரபாகரன் (பூந்தமல்லி), இணை இயக்குநா் (சுகாதார பணிகள்) மீரா, துணை இயக்குநா்கள் சேகா் (குடும்ப நலம்), சங்கீதா (காச நோய்), வசந்தி (தொழுநோய்), அரசு மருத்துவமனை மருத்துவ அலுவலா்கள், அரசு ஆரம்ப சுகாதார நிலையத்தை சோ்ந்த வட்டார மருத்துவா்கள், மருத்துவ அலுவலா்கள் ஆகியோா் பங்கேற்றனா்.