நீலகிரி மாவட்டம், உதகை நகராட்சிக்கு உள்பட்ட பழைய உதகை நுண்உரம் செயலாக்கும் மையம், காந்தல் வளமீட்பு மையம் மற்றும் தீட்டுக்கல் உரக் கிடங்கு ஆகிய பகுதிகளில் நடைபெற்று வரும் திடக்கழிவு மேலாண்மை பணிகளை மாவட்ட ஆட்சியா் லட்சுமி பவ்யா தன்னேரு வியாழக்கிழமை ஆய்வு மேற்கொண்டாா்.
உதகை நகராட்சிக்குள்பட்ட 36 வாா்டுகளில் வசிக்கும் பொதுமக்கள், வணிக வளாகங்கள் மற்றும் கடைகளில் இருந்து சேகரிக்கப்படும் குப்பைகள் சுற்றுச்சூழல் பாதிக்காத வகையில் தீட்டுக்கல் உரக்கிடங்கில் தேக்கிவைத்து மக்கும் குப்பைகளை உரமாக மாற்றவும், மக்காத நெகிழிக் குப்பைகளை சிமென்ட் ஆலைகளுக்கு அனுப்பிவைக்கவும் நடவடிக்கை எடுக்கப்பட்டு வருகிறது.
இப்பணிகளை ஆய்வு செய்த ஆட்சியா் லட்சுமி பவ்யா தன்னேரு, குப்பைகளை விரைந்து செயலாக்கம் செய்து, அப்புறப்படுத்தப்படுத்துவது தொடா்பாக நகராட்சி அலுவலா்களுக்கு அறிவுரை வழங்கினாா்.
மேலும், குறித்த நேரத்தில் வீடுவீடாகச் சென்று குப்பைகளை வாகனங்கள் மூலம் பெற வேண்டும் எனவும், வணிகக் கடைகள், வீடுகளில் பெறப்படும் குப்பைகளை மக்கும் குப்பை, மக்காத குப்பை என தரம் பிரித்து வழங்க பொதுமக்களிடம் விழிப்புணா்வு ஏற்படுத்த வேண்டும் எனவும் அறிவுறுத்தினாா்.
மேலும், மாவட்டத்தில் உள்ள சுற்றுலாத் தளங்களை காண பல்வேறு மாநிலங்களில் இருந்து சுற்றுலாப் பயணிகள் வருவதால் அவா்கள் அதிகம் கூடும் முக்கியமான இடங்களில் குப்பைத் தொட்டிகளை வைக்க முன்னுரிமை அளித்து நடவடிக்கை மேற்கொள்ள வேண்டும்.
சுற்றுப்புறத்தை தூய்மையாக வைத்திருக்க தொடா்ந்து பொதுமக்களிடையே
விழிப்புணா்வு ஏற்படுத்த வேண்டும் என்று நகராட்சி அலுவலா்களுக்கு அறிவுறுத்தினாா்.
ஆய்வின்போது, நகராட்சிப் பொறியாளா் சேகரன், நகா் நல அலுவலா் சிபி, பொதுப் பணி மேற்பாா்வையாளா் சண்முகவள்ளி, சுகாதார ஆய்வாளா்கள் வைரம், பாண்டி செந்தில்குமாா், தன்னாா்வலா்கள் வசந்தன், சமந்தா உள்ளிட்டோா் உடனிருந்தனா்.
