உயா் கல்வியில் இடஒதுக்கீடு: ஆதிதிராவிடா் நலத் துறை செயலரிடம் மனு

புதுச்சேரியில் உயா் கல்வியில் பட்டியலின, பழங்குடியின மாணவா்களின் இட ஒதுக்கீடு உரிமை பறிக்கப்படுவதைத் தடுக்கும் வகையில் உரிய நடவடிக்கை எடுக்க வேண்டும் என புதுவை மாநில ஆதிதிராவிடா் நலத் துறை செயலா் ஏ.முத்தம்மாவிடம் புதன்கிழமை கோரிக்கை மனு அளிக்கப்பட்டது.

முற்போக்கு மாணவா் கழகம் சாா்பில் அதன் மாநிலச் செயலா் தமிழ்வாணன் தலைமையில் அளித்த மனு விவரம்: புதுவையிலுள்ள உயா் கல்வி நிறுவனங்களுக்கான மாணவா் சோ்க்கையில் பட்டியலின, பழங்குடியின மாணவா்களுக்கான இட ஒதுக்கீடு பாதிக்கப்படும் வகையில் தரவரிசைப் பட்டியல் வெளியிடப்படுகிறது.

அரசு, தனியாா் மருத்துவக் கல்லூரிகளில் உள்ள முதுநிலை மருத்துவப் படிப்பில் சேரும் பட்டியலின மாணவா்களுக்கு மருத்துவ பாடப் பிரிவுகளில் போதிய அளவு இடங்கள் ஒதுக்கப்படுவதில்லை. அதே நேரத்தில் அவா்களுக்கு மருத்துவம் அல்லாத பாடப் பிரிவுகள் ஒதுக்கீடு செய்யப்படுகின்றன.

அதி முக்கியத்துவம் வாய்ந்த மருத்துவப் பாடங்களில் பட்டியலின மாணவா்கள் புறக்கணிக்கப்படுகின்றனா். அவா்களின் இட ஒதுக்கீடுக்கு ஏற்ப மருத்துவ அடிப்படையிலான பாடப் பிரிவுகளில் ஒதுக்கீடு வழங்குவது அவசியம் எனக் குறிப்பிடப்பட்டுள்ளது.