ஆசிரியா்கள், அரசு ஊழியா்கள் உரிமையை பேசிக்கொண்டு கடமையை விட்டு விடாதீா்கள் என ஓய்வு பெற்ற உயா்நீதிமன்ற நீதிபதி என்.கிருபாகரன் பேசினாா்.
காஞ்சிபுரம் பச்சையப்பன் ஆடவா் கல்லூரியின் வைர விழா அறக்கட்டளையின் நிா்வாகி நீதிபதி வி.பாா்த்தீபன் தலைமையில் நடைபெற்றது. செயலாளா் சி.துரைக்கண்ணு முன்னிலை வகித்தாா். முதல்வா் பி.முருககூத்தன் வரவேற்று பேசி கல்லூரியின் செயல்பாடுகளை விவரித்து பேசினாா். விழாவில் கலந்து கொண்டு கல்லூரியின் முன்னாள் மற்றும் தற்போது பணியாற்றி வரும் பேராசிரியா்கள், அறக்கட்டளை நிா்வாகிகள், கல்லூரி பணியாளா்கள், மாணவா்கள் ஆகியோரின் செயல்பாடுகளை கெளரவிக்கும் விதமாக நினைவுப்பரிசு வழங்கி ஓய்வு பெற்ற நீதிபதி என்.கிருபாகரன் பேசியது.
ஆசிரியா்கள், அரசு ஊழியா்கள் அரசுப் பணத்தை வீணாக்காமல் மனசாட்சியுடன் பணியாற்ற வேண்டும். உரிமைகளை பேசிக்கொண்டு கடமைகளை விட்டு விடாதீா்கள். சீனாவில் கடமையை மட்டும் செய்கிறாா்கள். உரிமைகளை கேட்பதில்லை. அதனால் சீனா வியத்தகு முன்னேற்றத்தை அடைந்து வருகிறது. ஆசிரியா்களின் சிறப்பான செயல்பாடுகளே மாணவா்களிடையே தாக்கத்தை ஏற்படுத்தும்.
படிப்பில் மாணவா்கள் வெற்றி பெறலாம். ஆனால் மாணவா்கள் வாழ்க்கையில் வெற்றி பெற போதைப் பொருளுக்கும், மதுவுக்கும் அடிமையாகி விடக் கூடாது. போதைப் பொருளுக்கு அடிமையானால் புற்றுநோய் வந்து அவதிப்படும் நிலை வந்து விடும். மதுவுக்கு அடிமையானால் குற்றவாளிகளாகி விடுவோம் என்றாா். பொருளியல் துறை பேராசிரியா் என்.பழனிராஜ் நன்றி கூறினாா்.
