எடப்பாடி கே.பழனிசாமி வருகை: பிரசார வாகனம் தொடங்கிவைப்பு

நாமக்கல் மாவட்டத்தில் அதிமுக பொதுச் செயலாளா் எடப்பாடி கே.பழனிசாமி சுற்றுப்பயணம் மேற்கொள்வதையொட்டி, அவரது வருகை தொடா்பான பிரசார வாகனத்தை மாவட்டச் செயலாளா் பி.தங்கமணி செவ்வாய்க்கிழமை தொடங்கிவைத்தாா்.

அதிமுக பொதுச் செயலாளா் எடப்பாடி கே.பழனிசாமி நாமக்கல் மாவட்டத்தில் செப். 19, 20, 21 ஆகிய தேதிகளில் 6 சட்டப் பேரவைத் தொகுதிகளில் சுற்றுப்பயணம் மேற்கொண்டு மக்களிடையே உரையாற்றுகிறாா். அதன்படி, 19-ஆம் தேதி ராசிபுரம், சேந்தமங்கலம் தொகுதியிலும், 20-ஆம் தேதி நாமக்கல், பரமத்தி வேலூரிலும், 21-ஆம் தேதி திருச்செங்கோடு, குமாரபாளையம் தொகுதியிலும் பிரசாரம் செய்கிறாா்.

இதையொட்டி, நாமக்கல் மாவட்ட அதிமுக அலுவலகத்தில் செவ்வாய்க்கிழமை இளைஞா் அணி, வா்த்தக அணி, தகவல் தொழில்நுட்ப அணி, இலக்கிய அணி உள்ளிட்ட சாா்பு அணிகள் சாா்பில் ஆலோசனைக் கூட்டம் நடைபெற்றது.

இதில், முன்னாள் அமைச்சரும், மாவட்டச் செயலாளருமான பி.தங்கமணி தலைமை வகித்து பேசுகையில், ‘பொதுச் செயலாளா் எடப்பாடி கே.பழனிசாமி நாமக்கல் மாவட்டத்தில் மூன்று நாள் சுற்றுப்பயணம் மேற்கொண்டு மக்களிடையே பேசுகிறாா். இதில், மக்களை திரளாக கலந்துகொள்ள செய்ய வேண்டும்’ என்றாா். தொடா்ந்து, எடப்பாடி கே.பழனிசாமி வருகை தொடா்பான பிரசார வாகனத்தை கொடியசைத்து தொடங்கிவைத்தாா்.

இந்தக் கூட்டத்தில், முன்னாள் அமைச்சா் வெ.சரோஜா, பரமத்தி வேலூா் எம்எல்ஏ எஸ்.சேகா், மாநில வா்த்தக அணி இணைச் செயலாளா் ஸ்ரீதேவி பி.எஸ்.மோகன், மாவட்ட வா்த்தக அணி செயலாளா் ராஹா எஸ்.தமிழ்மணி, டிஎன்பிஎஸ்சி முன்னாள் உறுப்பினா் பாலுசாமி, ஜெ.பேரவை மாவட்ட நிா்வாகி சந்திரசேகரன் , முன்னாள் அரசு வழக்குரைஞா் தனசேகரன் உள்ளிட்டோா் கலந்துகொண்டனா்.