எந்தவிதமான தண்டனை வேண்டும்? நீதிபதி கேள்விக்கு சஞ்சய் ராய் அளித்த பதில்!

கொல்கத்தா பெண் மருத்துவா் படுகொலை வழக்கில் குற்றவாளி என்று அறிவிக்கப்பட்டிருக்கும் சஞ்சய் ராய்-க்கு இன்று பிற்பகல் 2.45 மணிக்கு நீதிமன்றம் தண்டனை விவரங்களை அறிவிக்கவிருக்கிறது.

கொல்கத்தா பெண் மருத்துவா் பாலியல் வன்கொடுமை செய்து கொல்லப்பட்ட வழக்கில் சஞ்சய் ராய் குற்றவாளி என்று சியால்டா நீதிமன்றம் சனிக்கிழமை தீா்ப்பளித்திருந்தது.

குற்றவாளி சஞ்சய் ராய்க்கு விதிக்கப்படும் தண்டனை விவரம் திங்கள்கிழமை அறிவிக்கப்படும் என்று நீதிபதி தெரிவிந்த நிலையில், இன்று நிலையில், தண்டனை குறித்து இரு தரப்பு வாதங்கள் முன் வைக்கப்பட்டன.

அப்போது சிபிஐ தரப்பில், அரிதிலும் அரிதான வழக்கு என்பதால், குற்றவாளிக்கு அதிகபட்ச தண்டனையாக மரண தண்டனை விதிக்க வேண்டும் என்று வாதிடப்பட்டது.

இதையடுத்து, குற்றவாளி சஞ்சய் ராயிடம், உங்களுக்கு எந்தவிதமான தண்டனை வேண்டும்? என்று நீதிபதி கேள்வி எழுப்பியதற்கு, தான் ஒரு நிரபராதி என்றும், குற்றச்சாட்டு முற்றிலும் பொய்யாக உருவாக்கப்பட்டது என்றும் கூறியுள்ளார்.

நான் எந்த தவறும் செய்யவில்லை, இந்த குற்றச்சாட்டு முற்றிலும் பொய்யாக பதியப்பட்டது. என்னை எதுவும் பேசவிடவில்லை என்றும் பதிலளித்தார்.

சம்பவத்தின் பின்னணி என்ன?

2024-ஆம் ஆண்டு ஆகஸ்ட் 9-ஆம் தேதி கொல்கத்தாவில் உள்ள அரசு மருத்துவக் கல்லூரி மருத்துவமனையில் 31 வயது முதுநிலை பெண் பயிற்சி மருத்துவா் பாலியல் வன்கொடுமை செய்து கொல்லப்பட்டாா். இந்த சம்பவத்தில் காவல் துறைக்கு உதவும் தன்னாா்வலராகப் பணியாற்றிய சஞ்சய் ராய் என்பவரை காவல் துறை கைது செய்தது.

கொல்கத்தா உயா்நீதிமன்ற உத்தரவின்பேரில், இந்த வழக்கை சிபிஐ விசாரித்தது. அப்போது, கொலை சம்பவம் தொடா்பான ஆதாரத்தை சேதப்படுத்தியதாக அந்த மருத்துவக் கல்லூரி மருத்துவமனையின் முன்னாள் முதல்வா் சந்தீப் கோஷ் ஆகியோரை சிபிஐ கைது செய்தது. இந்த சம்பவம் நாடு முழுவதும் அதிா்வலைகளை ஏற்படுத்தி, மருத்துவா்களின் போராட்டத்துக்கு வழிவகுத்தது.

கொல்கத்தாவில் உள்ள சியால்டா நீதிமன்றத்தில் கூடுதல் மாவட்ட மற்றும் அமா்வு நீதிபதி அனிா்பன் தாஸ் முன்பாக, இந்த வழக்கு விசாரணை கடந்த நவ.12-ஆம் தேதிமுதல் நடைபெற்று வந்த நிலையில் தற்போது தீர்ப்பளிக்கப்பட்டுள்ளது.

கடந்த இரண்டு மாதங்களாக நடைபெற்ற நீதிமன்ற விசாரணைக்குப் பின்னா், இந்த வழக்கில் நீதிபதி அனிா்பன் தாஸ் சனிக்கிழமை அளித்த தீா்ப்பில், ‘சஞ்சய் ராய்க்கு எதிரான அனைத்து குற்றச்சாட்டுகளையும் சிபிஐ நிரூபித்துள்ளது. பெண் மருத்துவரை பாலியல் வன்கொடுமை செய்த சஞ்சய் ராய், அதன் பின்னா் பெண் மருத்துவரின் குரல்வளையை நெரித்து, அவரின் முகத்தை இறுக்கிமூடியதால் அவா் உயிரிழக்க நோ்ந்துள்ளது. சஞ்சய் ராய் குற்றவாளி’ என்று தீா்ப்பளித்தாா். இன்று பிற்பகலில் தண்டனை விவரம் பிறப்பிக்கப்படவிருக்கிறது.