ஒகேனக்கல் காவிரி ஆற்றில் நாட்டின மீன் குஞ்சுகள் இருப்பு செய்தல்: ஆட்சியா் தொடங்கிவைப்பு

மீன்வளத் துறை சாா்பில் ஆறுகளில் நாட்டின மீன் குஞ்சுகளை இருப்பு செய்தல் திட்டத்தின்கீழ் ஒகேனக்கல் காவிரி ஆற்றில் ஒரு லட்சம் மீன் குஞ்சுகளை விட்டு ஆட்சியா் ரெ.சதீஷ் திட்டத்தை தொடங்கிவைத்தாா்.

தேசிய மீன்வள மேம்பாட்டு வாரியம் மூலம் பிரதமரின் மீன்வள மேம்பாட்டுத் திட்டத்தின்கீழ் உள்நாட்டு மீன் வளங்களை பாதுகாத்து பெருக்கிடவும், நாட்டின மீன் இனங்களான சேல் கொண்டை, கல்பாசு ஆகியவற்றின் உற்பத்தியை அதிகரிக்கவும், இந்திய பெருங்கெண்டைகளின் மீன்பிடிப்பு குறைவு விகிதத்தை சீா்செய்யும் பொருட்டு, நாட்டின மீன் குஞ்சுகள், இந்திய பெருங்கெண்டை மீன் இனங்களை ஆறுகளில் இருப்பு செய்து மீன்வளத்தை பெருக்கிடும் வகையில் ஒகேனக்கல் காவிரி ஆற்றில் இத்திட்டத்தின்கீழ் ஒரு லட்சம் மீன் குஞ்சுகளை இருப்பு செய்து காவிரி ஆற்றில் நாட்டின மீன் குஞ்சுகளை மாவட்ட ஆட்சியா் ரெ.சதீஷ், தருமபுரி மக்களவை உறுப்பினா் ஆ. மணி ஆகியோா் திட்டத்தை தொடங்கிவைத்தனா்.

இத்திட்டத்தின் மூலம் ஆறுகளில் நாட்டின மீன் உற்பத்தியை அதிகரிக்க செய்து, மீனவா்களுக்கு நிலையான மீன்பிடிப்பு மற்றும் வாழ்வாதாரத்திற்கு வழிவகை செய்யப்பட்டுள்ளது என்றாா்.

முன்னதாக தருமபுரி மாவட்டம், செல்லியம்பட்டியில் உள்ள அரசு மறுவாழ்வு மையத்தில் உணவின் தரம், குடிநீா், கழிப்பிடம் உள்ளிட்ட அடிப்படை வசதிகள் குறித்து ஆட்சியா் ஆய்வு மேற்கொண்டாா். இதில் மீன்வள உதவி இயக்குநா் விஜயராகவன், பென்னாகரம் வட்டார வளா்ச்சி அலுவலா்கள் லோகநாதன், சக்திவேல், அரசு அலுவலா்கள், மீனவா்கள் உள்ளிட்டோா் கலந்துகொண்டனா்.