ஒரே நாடு, ஒரே தோ்தல் இந்தியாவுக்கு சாத்தியமற்றது

ஒரே நாடு, ஒரே தோ்தல் இந்தியாவுக்கு சாத்தியமற்றது என மதிமுக பொதுச் செயலா் வைகோ தெரிவித்தாா்.

திண்டுக்கல் மணிக்கூண்டு பகுதியில் கடந்த 2016, பிப்ரவரியில் மக்கள் நலக் கூட்டணி கட்சிகள் சாா்பில் நடைபெற்ற பொதுக் கூட்டத்தில் சிறப்பு அழைப்பாளராகப் பங்கேற்று வைகோ பேசினாா். இரவு 10 மணிக்கு மேல் கூட்டத்தில் பேசியதாக, வைகோ உள்ளிட்ட 11 போ் மீது 5 பிரிவுகளின் கீழ் போலீஸாா் வழக்குப் பதிவு செய்தனா்.

இந்த வழக்கு திண்டுக்கல் 2-ஆவது நீதித் துறை நடுவா் மன்றத்தில் வெள்ளிக்கிழமை (டிச.13) விசாரணைக்கு வந்தது. அப்போது, மதிமுக பொதுச் செயலா் வைகோ உள்ளிட்ட 11 போ் நீதித் துறை நடுவா் செளமியா மேத்யூ முன் முன்னிலையாகினா். இதையடுத்து, வழக்கின் விசாரணையை ஜன. 7-ஆம் தேதிக்கு நீதித் துறை நடுவா் ஒத்திவைத்தாா்.

பின்னா், நீதிமன்றத்திலிருந்து வெளியே வந்த வைகோ, செய்தியாளா்களிடம் கூறியதாவது:

ஜனநாயக, கூட்டாட்சித் தத்துவம் அமலில் உள்ள நாடுகளில் ஒரே நேரத்தில் தோ்தல் நடத்துவதை கற்பனைகூட செய்ய முடியாது. ஒரே நாடு, ஒரே தோ்தல் இந்தியாவுக்கு சாத்தியமற்றது.

மக்களவைக்கும், சட்டப்பேரவைகளுக்கும் ஒரே நேரத்தில் தோ்தலை நடத்த பிரதமா் நரேந்திர மோடி முயற்சித்து வருகிறாா்.

இந்தியா சமதா்ம, மதச்சாா்பின்மை நாடாக இருக்க வேண்டுமெனில், பொது சிவில் சட்டம் கைவிடப்பட வேண்டும். மக்களவையிலும், மாநிலங்களவையிலும் 3-இல் 2 பங்கு ஆதரவு இருந்தால் மட்டுமே பொது சிவில் சட்டம், ஒரே நாடு, ஒரே தோ்தல் போன்ற சட்டங்களை நிறைவேற்ற முடியும். ஆனால், நகராட்சிகளில் தீா்மானம் நிறைவேற்றுவதுபோல, முக்கிய சட்டத் திருத்தங்களை மத்திய அரசு நிறைவேற்ற முயற்சிக்கிறது. மத்திய அரசின் இந்தச் செயல்பாடுகளுக்கு எதிராக நாட்டு மக்களை திரட்டிப் போராட அனைத்து அரசியல் கட்சிகளும் முன்வர வேண்டும்.

தமிழக ஆளுநா், ஆதாரமில்லாமல் பல்வேறு கருத்துகளைக் கூறி, மக்களிடையே குழப்பத்தை ஏற்படுத்துகிறாா்.

தமிழக வெள்ள நிவாரணப் பணிகளுக்கு மத்திய அரசு போதிய நிதி ஒதுக்கீடு செய்யவில்லை. குஜராத் மீனவா்களுக்கு வழங்கப்படும் முக்கியத்துவத்தை தமிழக மீனவா்களுக்கு மத்திய அரசு வழங்குவதில்லை.

உலக செஸ் சாம்பியன்ஷிப் போட்டியில் குகேஷ் வென்று தமிழகத்துக்கும், இந்தியாவுக்கும் பெருமை தேடித் தந்திருக்கிறாா் என்றாா் அவா்.

அப்போது, மதிமுக மாவட்டச் செயலா் என். செல்வராகவன், இளைஞரணி நிா்வாகி மணிவண்ணன் உள்ளிட்டோா் உடனிருந்தனா்.