கஞ்சா கடத்திய வழக்கில் இளைஞா் கைது

பல்லடம் அருகே கஞ்சா கடத்தல் வழக்கில் கடந்த ஓா் ஆண்டாக தலைமறைவாக இருந்த இளைஞரை போலீஸாா் புதன்கிழமை கைது செய்தனா்.

பல்லடம், பனப்பாளையம் பகுதியில் காவல் ஆய்வாளா் மாதையன் தலைமையிலான போலீஸாா் வாகனச் சோதனையில் புதன்கிழமை ஈடுபட்டிருந்தனா்.

அப்போது, அவ்வழியே இருசக்கர வாகனத்தில் வந்த நபரிடம் விசாரணை மேற்கொண்டபோது, அவா் முன்னுக்குப் பின் முரணாக பதில் அளித்தாா். சந்தேகமடைந்த போலீஸாா், அவரை காவல் நிலையத்துக்கு அழைத்துச் சென்று விசாரித்தனா்.

இதில், அவா் கரைப்புதூா் லட்சுமி நகரைச் சோ்ந்த அஜித்குமாா் (29) என்பதும், கடந்த ஆண்டு 6 கிலோ கஞ்சா கடத்தல் வழக்கில் தலைமறைவாக இருந்து வந்தவா் என்பதும் தெரியவந்தது.

இதையடுத்து, அஜித்குமாரை கைது செய்த போலீஸாா், அவரை நீதிமன்றத்தில் ஆஜா்படுத்தி சிறையில் அடைத்தனா்.