ரெட்ரோ படத்தில் கனிமா பாடலின் உருவாக்கம் பழைய தமிழ்ப் பாடலின் தாக்கத்தினால் உருவானது என இசையமைப்பாளர் சந்தோஷ் நாராயணன் நேர்காணல் ஒன்றில் கூறியுள்ளார்.
கார்த்திக் சுப்புராஜ் இயக்கத்தில் நடிகர் சூர்யா, பூஜா ஹெக்டே ரெட்ரோ படத்தில் நடித்துள்ளார்கள்.
இந்தப் படத்தின் போஸ்ட் புரடக்ஷன் பணிகள் நடைபெற்று வருகின்றன.
இந்தப் படத்தில் இருந்து வெளியான கனிமா பாடல் சமூக வலைதளங்களில் மிகவும் வைரலானது. பல நடிகைகளும் இந்தப் பாடலுக்கு நடனமாடியது குறிப்பிடத்தக்கது.
இந்நிலையில் நேர்காணல் ஒன்றில் பங்கேற்ற இசையமைப்பாளர் சந்தோஷ் நாராயணன் இந்தப் பாடல் குறித்து பேசியதாவது:
கனிமா பாடலினை ரசிகர்களுக்காக ப்ரேக்டௌன் (எப்படி உருவானது) செய்ய வேண்டுமெனத் தோன்றுகிறது. ஏனெனில் இந்தப் பாடலில் மிகவும் பாரம்பரியமான இசைக் கருவிகளை பயன்படுத்தியுள்ளோம்.
என் ஆசை மைதிலியே பாடலின் தாக்கத்தினால்தான் இந்தப் பாடலை (கனிமா) உருவாக்கினேன். இதில் பயன்படுத்திய கருவிகள், எப்படி இசையை கலந்தேன், இதன் செயல்பாடுகள் குறித்து எல்லாம் கூற ஆசைப்படுகிறேன்.
இந்தப் படத்தில் பொதுவாக 80,90களில் இருந்த இசையையும் தற்போதுள்ள இசையையும் கலந்து புதியதாகக் கொடுக்க முயற்சித்துள்ளேன் என்றார்.
