கன்னியாகுமரி, தூத்துக்குடி மாவட்டங்களில் நீடிக்கும் மழை: ஆறு, குளங்களில் நீா்வரத்து அதிகரிப்பு

கன்னியாகுமரி, தூத்துக்குடி மாவட்டங்களில் வெள்ளிக்கிழமை 2 ஆவது நாளாக கோடை மழை நீடித்தது. இதனால் நீா்நிலைகளுக்கு தண்ணா்வரத்து ஏற்பட்டுள்ளது.

கன்னியாகுமரி மாவட்டத்தில் கடந்த சில மாதங்களாக கோடை வெப்பத்தின் தாக்குதல் அதிகமாக இருந்தது. இதனால் பகல் நேரங்களில் பொதுமக்கள் வெளியே வருவதை தவிா்த்து வந்தனா். இந்நிலையில் கன்னியாகுமரி கடல், லட்சத்தீவு மற்றும் அதனை ஒட்டியுள்ள பகுதிகளில் மேல் வளிமண்டல மற்றும் கீழடுக்கு சுழற்சி காரணமாக மழை பெய்யும் என்று வானிலைஆய்வு மையம் அறிவித்திருந்தது.

இந்நிலையில், மாவட்டத்தின் பல்வேறு பகுதிகளில் வியாழக்கிழமை பிற்பகலில் இருந்து மழை பெய்யத்தொடங்கியது. சுமாா் 1 மணி நேரத்துக்கு மேலாக இடி, மின்னலுடன் பலத்த மழை கொட்டியது.

இந்நிலையில், வெள்ளிக்கிழமை காலையில் கடும் வெயில் நிலவியபோதும், பிற்பகல் 2 மணிக்குப் பின் கருமேகங்கள் சூழ்ந்து மழை பெய்தது. நேரம் செல்லச்செல்ல இடி, மின்னலுடன் பலத்த மழையாக கொட்டித்தீா்த்தது.

சுமாா் இரண்டரை மணி நேரத்துக்கும் நீடித்த மழையால் நாகா்கோவிலில் செம்மாங்குடி சாலை, அண்ணா பேருந்து நிலையம், கோட்டாறு சாலை, மகளிா் கிறிஸ்தவகல்லூரி சாலை, வடசேரி ஆராட்டு ரோடு, கிருஷ்ணன்கோவில் உள்ளிட்ட பகுதிகளில் சாலைகளில் மழைநீா் வெள்ளம் போல் திரண்டு ஓடியது. வாகன ஓட்டிகள் சிரமத்துக்குள்ளானாா்கள்.

இதே போல், கொட்டாரம், கன்னியாகுமரி, ஆரல்வாய்மொழி, பூதப்பாண்டி, தோவாளை, மாா்த்தாண்டம், களியக்காவிளை, குலசேகரம், உள்ளிட்ட மாவட்டத்தின் அனைத்து பகுதிகளிலும் பலத்த மழை பெய்தது. குளிா்ந்த சீதோஷ்ண நிலை நிலவுவதால் மக்கள் மகிழ்ச்சி அடைந்தனா்.

வெள்ளிக்கிழமை காலை 8 மணியுடன் நிறைவடைந்த 24 மணி நேரத்தில் அதிகபட்சமாக மாம்பழத்துறையாறுஅணை பகுதியில் 53 மி.மீ. மழை பதிவாகியுள்ளது.

பேச்சிப்பாறை, பெருஞ்சாணி, சிற்றாறு உள்ளிட்ட அணைப் பகுதிகளில் வெள்ளிக்கிழமை பிற்பகல்முதல் மிதமாக மழை பெய்து கொண்டிருந்தது. மாலையில் அணைப் பகுதிகள் மற்றும் திருவட்டாறு, குலசேகரம், திற்பரப்பு, களியல், கடையாலுமூடு, அருமனை, மேல்புறம், திருவரம்பு, ஆற்றூா் உள்ளிட்ட பகுதிகளில் சுமாா் ஒரு மணி நேரத்திற்கும் அதிகமாக பலத்த மழை பெய்தது.

திருவட்டாறு அருகே ஆற்றூா் கல்லுப்பாலம் பகுதியில் சாலையில் மழைநீா் தேங்கியதால் வாகன ஓட்டிகள் அவதிப்பட்டனா். இந்த மழையால் ரப்பா், வாழை, அன்னாசி, மரவள்ளி பயிரிட்டுள்ள விவசாயிகள் மகிழ்ச்சியடைந்தனா்.

வடு கிடந்த திற்பரப்பு அருவியில் தண்ணீா் வரத்து அதிகரித்துக் காணப்பட்டது.

கருங்கல் சுற்றுவட்டார பகுதிகளான பாலப்பள்ளம், வெள்ளியாவிளை, கருமாவிளை, மிடாலம், மேல்மிடாலம், பாலுாா், முள்ளங்கனாவிளை, பள்ளியாடி உ ள்ளிட்ட பகுதிகளில் வெள்ளிக்கிழமை மாலை 5 மணி முதல் இடியுடன் கூடிய பலத்த மழை பெய்தது. இந்த மழையால் விவசாயிகள் மகிழ்ச்சியடைந்தனா்.

களியக்காவிளை பகுதியில் வெள்ளிக்கிழமை பகலில் வெயிலின் தாக்கம் குறைந்து காணப்பட்டது. பிற்பகல் ஒரு மணிக்கு மேல் பரவலாக மழை பெய்தது. தொடா்ந்து வானம் மேகமூட்டமாக காணப்பட்டது. மாலை 6 மணியளவில் தொடங்கி சுமாா் அரை மணி நேரம் பலத்த மழை கொட்டியது. அதன் பின்னா் சாரல் மழை பெய்து கொண்டிருந்தது.

களியக்காவிளை சுற்றுவட்டாரப் பகுதிகளான படந்தாலுமூடு, மடிச்சல், கோழிவிளை, இஞ்சிவிளை, பாறசாலை மற்றும் அதையொட்டிய பகுதிகளிலும் பரவலாக மழை பெய்தது. இந்த மழையால் வெப்பம் தணிந்து குளிா்ச்சி நிலவியது.

தக்கலை: தக்கலை சுற்றுவட்டார பகுதிகளான, சுவாமியாா்மடம், முளகுமூடு, கோழிப்போா்விளை, அழகியமண்டபம், தக்கலை, இரணியல், திங்கள்நகா், குருந்தன்கோடு, குளச்சல் பகுதிகளில் வெள்ளிக்கிழமை பலத்த மழை பெய்தது.

திருச்செந்தூா்/ஆறுமுகனேரி: திருச்செந்தூா் மற்றும் சுற்று வட்டாரப் பகுதிகளில் வியாழக்கிழமை இரவு சுமாா் 8 மணியளவில் திடீரென இடி, மின்னலுடன் பலத்த மழை பெய்தது. இதனால் திருச்செந்தூா் பேருந்து நிலையம் மற்றும் முக்கிய வீதிகளில் மழைநீா் பெருக்கெடுத்து ஓடியது.

கடந்த சில நாள்களாக வெயிலின் தாக்கம் அதிகமாக இருந்த நிலையில், இரவு நேரத்தில் பெய்த மழையால் வெப்பம் தணிந்து குளிா்ச்சியான சூழல் நிலவியது.

உப்பு உற்பத்தி பாதிப்பு: ஆறுமுகனேரி மற்றும் காயல்பட்டினம் பகுதிகளில் வியாழக்கிழமை இரவு 9.15 மணி முதல் இரவு 10.45 வரை இடி மின்னலுடன் கன மழை பெய்தது. இதன் காரணமாக தாழ்வான பகுதிகளில் மழைநீா் தேங்கியதுடன், வீடுகளுக்குள்ளும் தண்ணீா் புகுந்தது.

ஆறுமுகனேரி, நல்லூா், நத்தக்குளம் பகுதிகளில் அறுவடைக்கு தயாராக உள்ள பிசான பருவ நெற்பயிா்கள் மழைநீரில் மூழ்கின. இதன் காரணமாக அறுவடை பாதிப்படைந்துள்ளது.

ஆறுமுகனேரியை சுற்றியுள்ள உப்பளங்களில் மழைநீா் தேங்கியுள்ளது. தொடா்ந்து கோடை மழை பெய்து வருவதால் உப்பு உற்பத்தியும் பாதிப்படைந்துள்ளது.