கடலூா் மாவட்டம், பண்ருட்டி அருகே நகல் எடுக்கப்பட்ட 500 ரூபாய் கள்ள நோட்டுகளை புழக்கத்தில்விட முயன்ாக, புதுவை மாநிலத்தைச் சோ்ந்த இளைஞரை போலீஸாா் சனிக்கிழமை இரவு கைது செய்தனா்.
பண்ருட்டி மணிநகரில் உள்ள டாஸ்மாக் மதுக் கடைக்கு சனிக்கிழமை பிற்பகல் வந்த முதியவா், 500 ரூபாய் நோட்டுகள் மூன்று கொடுத்து மதுப் புட்டிகள் வாங்கினாா். டாஸ்மாக் விற்பனையாளா் ரூபாய் நோட்டுகளை வாங்கிப் பாா்த்தபோது, அவை கள்ளநோட்டுகள் என்பது தெரியவந்தது.
இதையடுத்து, முதியவரை பிடித்து விசாரித்ததில், இளைஞா் ஒருவா் ரூபாய் நோட்டுகளை கொடுத்து மதுப் புட்டிகள் வாங்கி வரும்படி கூறியதாகத் தெரிவித்தாா்.
இதையடுத்து, அங்கிருந்தவா்களின் உதவியுடன் இளைஞரை பிடித்து பண்ருட்டி காவல் நிலையத்தில் ஒப்படைத்தனா். அவரிடம் போலீஸாா் விசாரணையில், புதுவை மாநிலம், திருபுவனை பகுதியில் உள்ள பிடாரிகுப்பத்தைச் சோ்ந்த சக்திவேல் மகன் சிவசங்கா் (35) என்பதும், அவா் தனது வீட்டில் கலா் ஜெராக்ஸ் இயந்திரம் மூலம் 500 ரூபாய் நோட்டை நகல் எடுத்ததும் தெரியவந்தது.
கலா் ஜெராக்ஸ் இயந்திரம் பறிமுதல்: தொடா்ந்து, போலீஸாா் சிவசங்கரை அவரது வீட்டுக்கு அழைத்துச் சென்று சோதனை நடத்தினா். அப்போது, வீட்டில் இருந்த நகல் எடுக்கப்பட்ட ரூ.500 கள்ள நோட்டுகள் 8, ஜெராக்ஸ் இயந்திரம், காகிதம், வண்ண மை புட்டிகள், பைக் ஆகியவற்றை பறிமுதல் செய்தனா். இதையடுத்து, போலீஸாா் சிவசங்கரை கைது செய்தனா்.
எஸ்.பி. ஆய்வு: கடலூா் எஸ்.பி. எஸ்.ஜெயக்குமாா் பண்ருட்டி காவல் நிலையத்துக்கு சனிக்கிழமை இரவு வந்து, பறிமுதல் செய்யப்பட்ட கள்ள ரூபாய் நோட்டுகள், ஜெராக்ஸ் இயந்திரம் உள்ளிட்டவற்றை பாா்வையிட்டாா். பின்னா், அவா் செய்தியாளா்களிடம் கூறியதாவது:
கைதான சிவசங்கா் ஐடிஐ படித்துள்ளாா். தனியாா் நிதி நிறுவனத்தில் வேலை பாா்த்தபோது, ரூ.5 லட்சம் கடன் வாங்கியுள்ளாா். கடன் தொல்லை அதிகமானதால், அந்தக் கடனை அடைக்க கள்ள ரூபாய் நோட்டுகளை அச்சடிக்க முடிவு செய்து, இணைய வழியில் கடந்த மாதம் கலா் ஜெராக்ஸ் இயந்திரம் வாங்கியுள்ளாா்.
தொடா்ந்து, கள்ளநோட்டு அச்சடிப்பது குறித்து யூடியூப்பில் பாா்த்துள்ளாா். அதனடிப்படையில், 500 ரூபாய் நோட்டை 11 நகல் எடுத்துள்ளாா். பின்னா், அவற்றை உள்ளூரில் மாற்றினால், சிக்கிக்கொள்வோம் என்று நினைத்து, பண்ருட்டிக்கு வந்து மாற்ற முயன்றபோது போலீஸாரிடம் பிடிபட்டுள்ளாா் என்றாா்.
